ख्यालि न्हिली

खँ उबलय्यागु खः, गुबलय् सिनेमा हल थिएटर थें जुइगु खः अले सीटय् नम्बर दइमखुगु खः ।
छम्ह साहु थःगु कारं कुहां वल अले टिकट न्यानाः सिनेमा हलय् दुहां वन ।
‘पासा !’– वं सीट क्यनीम्ह मनूयात धाल— ‘जितः सस्पेन्स फिल्म स्वये तसकं यः । तर जि भचा न्हाय्पनं बांलाक मताः । जितः न्ह्यःने च्वंगु न्ह्यागुसां बांलाःगु सीटय् फ्यतुका बिउ ।’
टिपया लोभय् सीट क्यनीम्ह मनुखं साहुयात बांलाःगु सीटय् फ्यतुकाबिल ।
साहुं वयात टिप बिल —
छसुका वंगु छगः ।
सीट क्यनीम्ह मनुखं छसुका वंगु ध्यबा पलख पुतुपुइकाः स्वयाच्वन । अनंलि वं छ्यं क्वछुनाः उम्ह साहुया न्हाय्पनय् थ्यंक म्हुतु यंकाः चीसलं धाल— ‘साहुजी, हत्या चौकिदारं याःगु खः ।’