आर्यम नकःमिया ‘सनाखत’

येँ – नेपालभाषा संकिपा ख्यःया नांजाःम्ह निर्देशकलिसें कलाकार आर्यम नकःमिं न्हूगु संकिपा ‘सनाखत’ निर्माण याइगु जूगु दु । नेपालभाषा व खस् निगुलिं भासं निर्माण जुइगु संकिपाया वंगु मंगलवाः छगू ज्याझ्वःया दथुइ शुभमुहूर्त याःगु दु । ए.एन इन्टरटेन्मेन्टया ब्यानरय् दयेकेत्यंगु संकिपाय् नांजाःम्ह ख्यालिजुजु मदनकृष्ण श्रेष्ठया मू भूमिका दइ ।

शुभमुहूर्त ज्याझ्वलय् श्रेष्ठलिसें नांजाःम्ह कलाकार नारायणदेवी प्रधानं मुहूर्त शट बियादीगु खः । सामाजिक वियोगान्त बाखंया लिधंसाय् निर्माण जुइत्यंगु संकिपाया शुटिंग थ्व हे वालंनिसें शुरु यायेगु संकिपाया निर्देशकलिसें निर्मातातकं जुयादीम्ह नकःमिं कनादिल । संकिपाय् ख्यालिजुजु श्रेष्ठ व प्रधानयालिसें मदनदास श्रेष्ठ, राजाराम पौडेल, धिरेन शाक्य, सविन शाक्य, मनिषकुमार श्रेष्ठ, अर्णेश्वरी शिल्पकार, रविन्द्र
खड्का, सुनिता ठाकुर लगायत मेपिं कलाकारतय् अभिनय दइ ।

गोपालकाजी कायस्थ व सपना शर्मां मंकाःकथं निर्माण यानादीत्यंगु संकिपाय् एनआएनलिसें कलाकार मनिषकुमार श्रेष्ठ व वल्र्ड नेवाः अर्गनाइजेसन अमेरिकां नं लगानी याइगु जूगु दु । लक्ष्मण राजवंशीया बाखनय् निर्माण जुइत्यंगु संकिपाया शुभमुहूर्त ज्याझ्वलय् नांजाःम्ह हास्य कलाकार हरिवंश आचार्यं शुभमुहूर्त निर्देशन, मेम्ह हास्य कलाकार सन्तोष पन्तं क्ल्याप व नायक धिरेन प्रधानं नैंक्याः
तछ्यानादीगु खः ।