ख्वनाय् मुआब्जा कायेत सुचं वयेवं विरोध
स्थानीयपाखें यल जिल्ला प्रशासन ज्याकुथिइ ध्यानाकर्षण पौ लःल्हात
येँ (नेपालभाषा टाइम्स) – जिल्ला प्रशासन कार्यालय, यलं फास्ट ट्राय्क दयेकेगु झ्वलय् लाःगु जग्गाया मुआब्जा काःवा धकाः गोरखापत्रय् सुचं पिथने वं उकियात कयाः विरोध यायेगु ज्या जूगु दु ।
गोरखापत्रय् पिदंगु जग्गाया क्षतिपूर्ति सुचं सम्बन्धय् थःपिनिगु ध्यानाकर्षण जूगु खँ जनसरोकार समिति खोकनां धाःगु दु । अथे हे सरोकारवाला स्थानीय जनता व बुँ थुवाःतय्सं जिल्ला प्रशासन कार्यालयया प्रमुख जिल्ला अधिकारी नरहरी घिमिरेयात ध्यानाकर्षण पौ लःल्हाःगु दु ।
वंगु २०८३ असार ४ गते कुन्हु गोरखापत्र न्हिपतिइ जिल्ला प्रशासन कार्यालय यलं येँ-तराई-मधेश फास्टट्राय्क आयोजनाया जग्गा मुआब्जा सम्बन्धी सुचं पिथंगु खः । अदालतय् विचाराधीन मुद्दा दुगु अवस् थाय् मुआब्जाया सुचं पिथंगु धासें स्थानीय सरोकार वालातय्सं विरोध प्वंकूगु खः । येँ-तराई-मधेश फास्ट ट्राय्कयात कयाः २०७६ माघ २० गते कुन्हु सर्वाेच्च अदालतय् मुद्दा दायर जूगु खःसा थ्व मुद्दाय् जिल्ला प्रशासन कार्यालय यल नं प्रतिवादी दु । सर्वोच्च अदालतं जिल्ला प्रशासन कार्यालययात सम्बन्धित फाइल तत्काल पेश यायेत आदेश बियातःगु दु ।
यल जिल्ला प्रशासन कार्यालयय् लःल्हाःगु ध्यानकर्षण पतिइ सर्वोच्च अदालतय् मुद्दा विचाराधीन जुयाच्वंगु अवस्थाय् जग्गाया क्षतिपूर्ति बीगु निंतिं मेगु सार्वजनिक सुचं पिथनेगु सुशासन व जवाफदेहिताया सिद्धान्त अःखः जूगु व थ्व सुचंया कारणं सर्वाेच्च अदालतया अवहेलना जूगु खँ धयातःगु दु ।
स्थानीय जनतां थःपिंसं सलंसः दँनिसे ख्वना व बुंगय् च्वना वयाच्वनागु व थुगु ऐतिहासिक व सांस्कृतिक रूपय् महत्वपूर्ण क्षेत्रया उर्वर कृषि भूमिया संरक्षण व प्रवद्र्धन यासें छगू पुस्तां मेगु पुस्तायात हस्तान्तरण याना वयाच्वनागु खँ नं ध्यानाकर्षण पतिइ न्ह्यथनातःगु दु ।
स्थानीयतय्सं ख्वनाया ऐतिहासिक क्षेत्र तथा भूमियात गुगुं नं मूल्यया मुआब्जा व क्षतिपूर्तिं भरपाई याये मफइगु खँ धासें ऐतिहासिक सांस्कृतिक सामाजिक अस्तित्वलिसे स्वाःगु सांस्कृतिक थाय् संरक्षण यायेगु निंतिं स्पष्ट रुपं फास्ट ट्राय्क ख्वना व बुंगः जुया यंकेगु पाय्छि मजूगु धासें वैकल्पिक उपाय सहितया सुझाव गृह मन्त्रालय पेश यानातःगु दु ।
अथे हे आदिवासी जनजाति आयोगं यल मनपा वडा नं २१ य् लाःगु ख्वनाया खुडो लय् दुगु येँ-तराई-मधेश फास्ट ट्राय्कया जिरो प्वाइन्ट कायम यात धाःसा अनया आदिवासी जनजाति नेवाः समुदायया धार्मिक लिसें सांस्कृतिक सम्पदाया क्षयीकरण जुइगु व सम्बन्धित व्यक्तिया जग्गा अधिग्रहण जुयाः व्यक्तिगत सम्पत्तिइ तकं लिच्वः लाइगु जूगुलिं फास्ट ट्राय्कया प्रस्थान विन्दु मेथाय् दयेके त प्रधानमन्त्री कार्यालययात सुझाव बिउगु खः । ध्यानकर्षण पतिइ थ्व खँ नं लुमंकातःगु दु ।
LEAVE YOUR COMMENTS