ने. सं. ११४६ तछलाथ्व अष्टमी -

शुरु जुल त्वाः त्वालय् संकिपा महोत्सव

येँ (नेपालभाषा टाइम्स) – येँ महानगरपालिकाया ग्वसालय् वंगु शुक्रवाःनिसें ‘त्वाः त्वालय् संकिपा महोत्सव’ औपचारि क रुपं शुरु जूगु दु । येँ महानगरपालिकां शुक्रवाः चकं दबुलिइ (खुल्लामञ्च) य् छगू विशेष ज्याझ्वः यानाः महोत्सव शुरु याःगु खः ।

येँ महानगरपालिकाया कार्यवाहक प्रमुख सुनिता डंगोलं उलेज्या यानादीगु संकिपा महोत्सवय् न्हापांगु दिं स्वंगू चीहाः संकिपा क्यंगु खः । महोत्सवया न्हापांगु दिं अमन शाहीं निर्देशन यानादीगु ‘नन्द’ , ताराङं निर्देशन यानादीगु ‘सवारी साहित्य’ व इशान भुषालं निर्देशन यानादीगु ‘पेन्गुइन रिभोलुन’ क्यंगु खः । काठमाडौं माउण्टेन फिल्म फेस्टिभल (किम्फ)या सहकार्यय् महोत्सवय् चीहाः संकिपा क्यंगु खः ।

उगु इलय् छुं दिं न्ह्यः फ्रान्सया कान्स सहरय् जूगु ‘कान्स फिल्म फेस्टिभल’ य् अनसर्टेन रिगार्ड विधाय् ‘जुरी अवार्ड’ व ‘वेस्ट साउण्ड क्रियसन’ अवार्ड त्याकेत ताःलाःगु अविनाश विक्रम शाहं निर्देशन यानादीगु संकिपा ‘इलिफेन्ट अन द फग’ यात झिगू लख तका दांसहित हने ज्यानं याःगु खः ।

अथे हे चीहाः संकिपाया प्रदर्शनया दथुइ नेपाःया लोकंह्वाःगु सांगीतिक पुचः ‘कुतुम्ब’ सांगीतिक प्रस्तुति बिउगु खःसा सांस्कृतिक ज्याझ्वः न न्ह्यब्वःगु खः ।

येँ महानगरपालिकां बिउगु जानकारीकथं असार लछियंकं शुक्रवाः व शनिवाःपतिकं येँया थीथी सार्वजनिक थाय्, त्वाः, दबू, पार्क, ख्यः, चुक, ननि आदि थासय् महो त्सव संचालन जुइ । महोत्सवय् चलचित्र विकास बोर्ड, ब्रिटिस काउन्सिल नेपाल, युनेस्को, किम्फ, नेपाल फिल्म एकेदेमिलिसेया सहकार्यय् संकिपात क्यनी । महोत्सवया व्यवस्थापन स्थानीय संघसंस्था, खलः पुचलं याइगु जूगु दुसा उकिया निंतिं अज्याःगु संस्थाया छनोट नं याये धुंकूगु दु ।

न्हापांगु दिं इको ज इन द भ्यालिं व्यवस्थापन याःगु खः । निन्हुया दिं नीलः सांस्कृतिक पुचःया व्यवस्थापनय् असनय् महोत्सव याःगु खः । थुकथं हे वइगु दिनय् ल्हुति, बागबजाः सतकखण्ड, भाष्कर कीर्ति महाविहार (यतखा), लगं, मय्ति अजिमा परिसर या ख्यलय् नं महोत्सव संचालन जुइ ।