च्याम्पियन्स लिगय् पिएसजी व लिभरपुल त्यात

एजेन्सी-युरोपियन च्याम्पियन्स लिगया मंगलवाः चान्हय् जूगु कासाय् पिएसजी व लिभरपुल विजयी जूगु दु । च्याम्पियन्स लिगया नकआउट चरणया न्हापागुं लेगय् फ्रेन्च क्लब पिएसजीं स्पेनिस क्लब बार्सिलोनायात व लिभरपुलं जर्मनया लाइपजिगयात बुकूगु खः।

लिभरपुलं लाइपजिगयात वयागु हे ख्यलय् बुकेगु झ्वलय् शून्यया विरुद्ध निगू गोल यात । कासाया न्हापागुं हाफ बराबरी जूगु खःसा निगूगु हाफया ५३ औं मिनेटय् मोहम्मद सलाहया गोलं लिभरपुलं अग्रता काःगु खः । सलाहं गोल याःगुया न्यागू मिनेट लिपा हे साडियो माने थप छगू गोल यासें क्लबयात विजयपाखे न्ह्याकूगु खः ।

मेगु कासाय् बार्सिलोना १–४ गोलं बूगु खः । बार्सिलोनायात तःधंगु अन्तरं बुकेगु झ्वलय् केलियन एमबाप्पें ह्याट्रिक याःगु खः। एमबाप्पें कासाया ३२, ६५ व ८५ मिनेटय् गोल याःगु खः । पिएसजीपाखें मेगु छगू गोल मोइस किनं यात । बार्सिलोनाया निंतिं कप्तान लियोन मेसीं पेनाल्टीं छगू जक गोल याःगु खः ।

च्याम्पियन्स लिगया मेगु कासा बुधवाः चान्हय् एफसी पोर्टो व युभेन्ट्स अले सेभिया व डर्टमुन्ड दथुइ जुइ ।