ने. सं. ११४६ तछलाथ्व षष्ठी - सिथि नखः कुमार षष्ठी

मल्लया ‘सेप्टेम्बर १७’ अंग्रेजी भासं पिहां वइगु

येँ (नेपालभाषा टाइम्स) – नेपालभाषा एकेडेमिया चान्सलर नापं वरिष्ठ साहित्यकार मल्ल के. सुन्दरया ‘सेप्टेम्बर १७’ उपन्यास अंग्रेजी भासं पिहां वइगु जूगु दु ।

नेवाः भाय्या नांजाःगु थुगु उपन्यास भारतया आर्दश बूक्स, न्हू दिल्लीपाखें पिकाये त्यंगु खः । अंग्रेजी भासं भाय् अनुवाद प्रा.डा. ज्योतिप्रभा तुलाधरं यानादीगु खः । च्वमि मल्लया कथं लच्छि लिपा येँय् छगू ज्याझ्वःया दथुइ सफू विमोचन जुइ । सफू प्राध्यापक अभि सुवेदीया ल्हातं पितब्वज्या याइगु ज्याझ्वः दु ।

विदेशय् जन्म जूम्ह ने वाःमचा नेपालय् वयाः थःगु म्हसीका माःवइगु बाखं थुगु उपन्यासय् दु । न्हापा थःगु म्हसीकाया बारे छुं नं मस्यूम्ह मनूखं थःगु अस्तित्व हे संकटय् लाःगु महसुस यानाः थःगु कुल छेँ, थःगु संस्कृति व मुक्कं म्हसीकाया बारे सीकेत अमेरिकां नेपाः वइगु बाखं दुगु थुगु उपन्यास नेवाः ख्यलय् तसकं चर्चा जूगु सफू खः ।

अंग्रेजी भासं सफू पिहां वये धुंकाः नेपालं पिने च्वनाच्वंपिं नेवाः भाय् ल्हाय् मसःपिं आपालं नेवाःतय्त थःगु म्हसीकाया बारे थ्व सफूपाखें सिइके फइगु विश्वास च्वमि मल्लया दु । वय्कःया कथं सफू ब्वने धुंकाः ब्वनामि व नेवाः म्हसीकाया स्वापु अझ अप्वः क्वाःतुइ । उपन्यासया माध्यमं देशं पिने नं नेवाः म्हसीकाया बारे बांलाःगु प्रचार जुइगु विश्वास नं वय्कलं कयादीगु दु ।

थुगु उपन्यासयात कयाः क्यानाडाया क्वान्टलेन पोलिटेक्निकल विश्वविद्यालय, दक्षिण एसियाली साहित्य व अनुसन्धान प्रतिष्ठानया ग्वसालय् जूगु ‘विश्व साहित्य दबुली ने पाःया साहित्य’ शीर्षकया अन्तर्राष्ट्रिय गोष्ठी व से मिनार नं जुइधुंकूगु दु ।

उगु गोष्ठीइ संयुक्त राज्य अमेरिका, ओरेगन राज्य पोर्टलैण्ड रीड कलेजया मानविकी व अंग्रेजी साहित्यया सहायक प्राध्यापक क्रिटिस राजभण्डारीं विश्व आख्यान साहित्य ख्यलय् ‘सेप्टेम्बर १७’ उपन्यासया थाय् छु जुइफु धयागु बारे कार्यपत्र न्ह्यब्वयादीगु खः ।