खड्गी समाजया नाय्खिं बाजं प्रशिक्षण
येँ – नेपाल राष्ट्रिय खड्गी समाज गोकर्णेश्वर नगरपालिका संयुक्त ईकाइ व गोकर्णेश्वर नगरपालिका वडा नं. ६ या मंकाः ग्वसालय् परम्परागत नाय्खिं बाजं प्रशिक्षण ज्याझ्वः न्ह्याःगु दु । उगु नाय्खिं बाजं प्रशिक्षण ज्याझ्वःया उलेज्या गोकर्णेश्वर नगरपालिकाया उपप्रमुख शान्ति नेपालं यानादीगु खः ।
समाजया संयुक्त ईकाइ समितिया गौतम खड्गीया सभापतित्वय् जूगु प्रशिक्षण उलेज्याझ्वलय् समाजया केन्द्रीय समितिया कार्यवाहक नायः न्हुछेरत्न शाही विशेष पाहांकथं झायादीगु खः । ज्याझ्वलय् पाहांकथं गोकर्णेश्वर नगरपालिकाया प्रमुख सल्लाहकार दिपक रिसाल, क्षेत्र नं. ३ या दुजः शम्भुप्रसाद अधिकारी, ५नं वडाअध्यक्ष नारायणबहादुर सुवेदी, ६ नं. वडाअध्यक्ष रमेश अर्याल, ८ नं. वडाअध्यक्ष मनोज ढुंगाना, केन्द्रीय सचिव मिलन शाही, समाजया येँ जिल्ला समितिया अध्यक्ष सुभाष शाही, चामुन्दा किवास संरक्षण कोषया अध्यक्ष विमल शाही लगायतया उपस्थिति दुगु खः । ज्याझ्वलय् पाहांकथं झायादीपिं वडाअध्यक्षपिंपाखें नाय्खिं बाजनय् पुजा यानाः न्हय्ज्वः बाजं मुख्य प्रशिक्षक किशोर शाहीयात लःल्हाःगु खः ।
ईकाइया रिनां शाहीं लसकुस यानादीगु ज्याझ्वलय् उपप्रमुख नेपाल, वडाअध्यक्ष लगायतं संस्कृति ल्यंकेगु निंतिं समाजं न्ह्याकीगु हरेक ज्याय् सहकार्य यानाः न्ह्याः वनेगु प्रतिवद्धता प्वंकादीगु खः । कार्यवाहक नायः शाहीं नाय्खिं बाखं खड्गी समुदायया पहिचान जूगुलिं अनुशासित जुयाः प्रशिक्षण कयाः संस्कृति ल्यंकेगु ज्याय् ल्याय्म्ह पुस्तायात न्ह्यचिलेत इनाप यानादिल ।
LEAVE YOUR COMMENTS