नेवाःतय् थीथी पक्षया १८ गू ज्यापौ

येँ – वल्र्ड नेवाः अर्गनाइजेशनया ग्वसालय् येँय् जुइगु ‘विश्व नेवाः दिवस’ य् अमेरिका लिसें क्यानाडा, जापान, नेदरल्याण्ड, बेलायत, भारत आदि देय्या नेवाःतय्सं ब्वति काइगु खँ ग्वसाः खलकं धाःगु दु । थुकी अमेरिकां जक १५ म्ह नेवाःतय्सं ब्वति काइगु निश्चित जुइधुंकूगु खँ नं धाःगु दु । थ्वहे वइगु मार्च ३० व ३१ गते निन्हुयंकं येँया नेपाः ब्यांक्वेटय् थ्व ज्याझ्वः याइगु ग्वसाः दु । थुकी नेपाःपाखें नं आपालं विज्ञ व नेवाः न्ह्यलुवातय्सं ब्वति काइ ।
ज्याझ्वलय् निन्हुयंकं थीथी विषयय् ज्यापौ नं न्ह्यब्वइगु ग्वसाः दु । ग्वसाः खलकं ज्यापौया लागिं अवधारणा आह्वान याः कथं आः तक १८ गू ज्यापौया प्रस्ताव दुहां वयेधुंकूगु खँ ग्वसाः खलःया भाजु दयारत्न शाक्यं ‘नेपालभाषा टाइम्स’ यात कनादिल ।

वय्कलं कनादी कथं ज्याझ्वलय् छगू श्रव्यदृश्य ज्यापौ नं न्ह्यब्वयेगु ज्या जुइ । ग्वसाः खलःपाखें निगू अवधारणापत्र न्ह्यब्वइगु खँ धाःगु दु । अथे हे सांस्कृतिक ज्याझ्वः नं क्यनेगु ग्वसाः जुयाच्वंगु दु ।ज्याझ्वलय् शुल्क पुलाः विश्वया न्ह्याम्ह नेवालं नं ब्वति काये फइगु व्यवस्था यानातःगु दु । उकिया लागिं अनलाइनपाखें नां दुतिनेगु ज्या न्ह्यानाच्वंगु दु । ज्याझ्वलय् ब्वति कायेत विदेशय् च्वंपिंसं ६० अमेरिकी डलर व नेपालय् च्वंपिंसं द्वःछि
तका शुल्क पुले माःगु व्यवस्था यानातःगु दु । ज्याझ्वःया ग्वसाः खलः वल्र्ड नेवाः अर्गनाइजेशन खःसा नेपालय् उकियात डब्लुएनओ नेपाः च्याप्टर व नेपालभाषा केन्द्रीय विभागपाखें सहआयोजक जुयाः ग्वाहालि याइगु खँ धाःगु दु ।