च्याला दुम्ह मचा थाकुलि यानाः असं पायः पिहां वल
येँ(नेपालभाषा टाइम्स)÷वंगु कौलाथ्व एकादशि कुन्हु असंया उराय्तय्सं असं पायः पिथंगु दु । मेपिं सकसिनं कौलाथ्व दशमिकुन्हु चालं यानाः नःलास्वां क्वकयाः सिन्हः तीगु चलन दुसा असंया उराय्तय् एकादशि कुन्हु असं चालं धकाः स्वां क्वकायेगु याइ ।
थ्व कुन्हु असंया उरायतय् दकलय् चिधिकःम्ह मचायात थाकुलि यानाः असं पायः पिथनेगु नं चलन दु । असं बाकुननिइ च्वंगु आगंछेँय् पुजा यानाः मचायात थाकुलि यानाः वयागु हे नेतृत्वय् पायः पिथनेगु याना वयाच्वंगु दु । थुगुसी च्याला जक दुम्ह हर्षिलरत्न तुलाधरयात थाकुलि यानाः पायः पिथनेगु झ्वलय् असंया लागा चाःहिलाः आगंछेँय् थ्यंकाः क्वचायेकूगु खः ।
आगंछेँय् दुहां वनेगु झ्वलय् च्याला दुम्ह उम्ह मचापाखें दकलय् न्हापां भुयुफसि पालेगु ज्या याःगु खःसा अनंलि पायः वःपिं सकसिनं पालंपाः भुयुफसि पाःगु खः । असं पायः पिहां वःगु इलय् असं गुंलाबाजंपाखें धाःबाजं थानाः चाःहिउगु खः ।
असंया बाकुननिइ आगं दुपिं तुलाधर समुदायपाखें पायः पिथनेगु परम्परा दया वयाच्वंगु दुुुसा पायः पिथनेत थाकुलि जुइम्ह मचायात वयागु छेँय् बाजं थानाः काः वनेगु चलन दु ।
LEAVE YOUR COMMENTS