हलिं नेवाः दिवस हनीगु

येँ -प्यक्वःगु हलिं नेवाः दिवस तःजिक हनीगु जूगु दु । थ्वहे वइगु मार्चया अन्तिम शनिवाः कुन्हु येँया बसन्तपुली न्हिछियंकं थीथी ज्याझ्वः यासें थ्व दिवस हनेत्यंगु खः । ज्याझ्वलय् थीथी ख्यःया च्याम्ह नेवाः व्यक्तित्वपिंत हनीगु नं ज्याझ्वः दु ।

मंगलवाः पत्रकार सम्मेलन यासें बिउगु जानकारी कथं येँ महानगरपालिकाया मेयर विद्यासुन्दर शाक्य मू पाहाँ कथं झायादीगु ज्याझ्वलय् सर्वोच्च शिखर सगरमाथा उत्तर व दक्षिण निगुलिं मोहडां गयेत ताःलाःम्ह न्हापांम्ह मिसा पत्रकार कल्पना महर्जनयात हनीगु जूगु दु ।

अथेहे नांजाःम्ह म्ये हालामि मदुम्ह रमेश ताम्राकारया लुमन्तिइ नीस्वंगु सिरपाः नं थ्व हे ज्याझ्वलय् न्हापांखुसी लःल्हाइग्ु जूगु दु ।
ज्याझ्वःया झ्वलय् नेपालभाषा साहित्य विशिष्ट योगदान बियादीपिं नेवाः पुर्खापिनि किपा प्रदर्शनी नं याइगु जूगु दु ।