ने. सं. ११४३ तछलाथ्व द्वादशी -

मलेसियन विमानय् क्षेप्यास्त्र कयेकूलिइ प्यम्ह दोषी ठहर

मलेसियन एयरलाइन्सया एमएच १७ विमान कुर्कूगु सम्बन्धय् छानविन यानाच्वंगु अनुसन्धानकतातय्सं स्वम्ह रुसी व छम्ह युक्रेनी नागरिकयात दोषी ठहर याःगु दु ।युक्रेनया आकाशय् ब्वाच्वंगु इलय् न्यादँ न्ह्यव विमानयात गोलीं कयेकाः कुर्कूगु खः । थुकी लानाः विमानय् च्वनावःपिं २९८ म्हं सीगु खः ।

अनुसन्धानकर्तातय्सं रुसी नागरिक आइगोर गर्किन, सर्गेइ डुबिन्स्की व ओलेग पुलाभोटया लिसें युक्रेनी नागरिक लियोनिद खार्चेन्कोयात दोषी ठहर याःगु खः । थुपिं प्यम्ह डोनेस्क पिपुल्स रिपब्लिकया पृथकतावादी सैनिक व जासुसी नेतात खः ।नेदरल्यान्डया अनुसन्धाता फ्रेड वेस्टरबेकं पूर्वी युक्रनय् रुसपाखें अत्याधुनिक बियुके क्षेप्यास्त्र प्रणाली दुत हयेगु ज्याय् थुपिं प्यम्ह हे मू जिम्मेवार खः धासें तर उमिसं हे क्षेप्यास्त्र कयेकूगु खः कि मखु धयागु पुष्टि मजूनिगु खँ धाःगु दु ।

थ्व मामिलाय् दोषी ठहर जूपिंत वइगु दँया मार्च निसें नेदरल्यान्डय् मुद्दा न्ह्याकीगु जूगु दु । तर रुसी व युक्रेनं थःपिनिगु देय् नागरिकतय्त नेदरल्यान्डय् सुपुर्दगी यायेत अस्वीकार याःगुलिं उमिगु अनुपस्थितिइ हे मुद्दाया सुनुवाइ जुइगु जूगु दु । रुसं विमान कुर्कूगु सम्बन्धय् थःगु देय्या नागरिक निर्दोष दुगु दावी यानाच्वंगु दु ।

अनुसन्धानकर्तातय् सिफारिस कथं दोषी ठहर जूपिं प्यम्हेसिया विरुद्ध अन्तर्राष्ट्रिय पक्राउ पूर्जी जारी यायेधुंकूगु दु । अनुसन्धानकर्तातय्सं उपिं प्यम्हेसितं सुपुर्दगी हे यायेमाः धकाः धायेमफइगु खँ धाःगु दु । ‘रुस व युक्रेनया कानुनय् हे थः नागरिकयात सुपुर्दगी यायेगु प्रावधान मदुगुलिं सुपुर्दगी या धायेफइमखु, तर अनुसन्धनय् निगुलिं देशं ग्वाहालि यायेमाः धयागु खँय् जिमिगु धारणा दु’ अनुसन्धानकर्ता वेस्टरबेकं धाःगु दु ।

मलेसियन एयरलाइन्सया उगु विमान नेदरल्यान्डसया आम्स्टर्डमं मलेसियाया क्वालालम्पुर वनाच्वंगु इलय् क्षेप्यास्त्र कयेकाः कुर्कूगु खः । थ्व घटनाय् लानाः सीपिनि थःथितिपिंसं दोषीयात कारवाही यायेत सिफारिस याःगुयात लसकुस याःगु दु ।