सीम्हेसिया म्हपाखें साः

झीगु समाजय् सीम्ह मनूयात च्याकेगु संस्कार दु, मुस्मां समुदाय् सीम्ह गाः खनाः ल्हाकाछ्वइ । थ्व थःथःगु संस्कार व संस्कृति व परम्परा खः । अमेरिकाय् नं अप्वःथें सीम्ह ल्हाकेगु हे चलन खः । तर आः अमेरिकाय् सीम्ह ल्हाकेगु मखसे सीम्हपाखें कम्पोष्ट साः दयेकीगु जूगु दु । अमेरिकां उकिया निंतिं अनुमति नं काःगु दु ।

वाशिंगटन डिसीया गभर्नर जोय स्ल्लीं बेलायतया छगू निजी अनलाइन ‘स्काई न्यूज’यात बिउगु जानकारीकथं आः थःपिंसं मानव कम्पोष्टया निंतिं विधेयक तयार यानाच्वनागु धाःगु दु । थुकियात ‘नेचुरल अर्गानिक रिडक्सन’ धकाः धाइ । थ्व स्वयां न्ह्यः नं वाशिंगटनं सीम्हयात विना कफिन च्वं तयातयेगु व सीम्हेसिया म्हसीका मबीगु ‘ग्रीन सेमेट्रिज’या अवधारणा न्ह्यःने हःगु खः ।

सीम्हेसित कम्पोष्ट मलय् हिले धुंकाः उकी सिँ चुं, छ्वाली व चा ल्वाकछ्याइ । थ्व प्रणाली मेमेगु कम्पोष्ट मल दयेके थें खःसा मानव कम्पोष्ट मलयात नं कृषिइ प्रयोग याये मिले जुइगु खँ धाःगु दु ।

मानव कम्पोष्ट मल दयेकेगु निंतिं हे धकाः सन् २०१८ य् खुम्ह गम्भिर प्रकृतिया विरामीतय्सं थःगु म्ह थुगु प्रोजेक्टया निंतिं दान यायेगु घोषणा नं याःगु खः । थुगु योजना वातावरणीय ल्याखं व दीप वा सीगाःया थाय्या अभावया समस्या नं सहज जुइगु गभर्नर स्ल्लीया दावी दु । थज्याःगु हे प्रचलन स्वीडेनय् नं दु ।