ने. सं. ११४४ ञलाथ्व नवमी -

ट्रम्प वाइडेनयात सत्ता हस्तान्तरण यायेत तयार जुल

एजेन्सी – अमेरिकी राष्ट्रपति डोनाल्ड ट्रम्पं राष्ट्रपतिइ निर्वाचित जो बाइडनयात सत्ता हस्तान्तरण यायेत स्वीकार यानादीगु दु । वय्कलं थुकिया निंतिं ज्या याइगु संघीय निकाय जनरल सर्भिसेस एड्मिनिस्ट्रेसन (जिएसए)यात यायेमाःगु ज्या यायेत सिफारिस यानागु खँ धयादीगु दु । तर वय् कलं निर्वाचनया लिच्वःविरुद्ध थःगु कानुनी लडाइँ धाःसा न्ह्यानाच्वनीगु खँ धयादीगु दु ।

अमेरिकी राज्य मिशिगनय् जो बाइडन त्याःगु औपचारिक रुपं प्रमाणित यायेवं राष्ट्रपति निर्वाचनया मतगणनायात हाथ्या बीगु डोनाल्ड ट्रम्मया कुतलय् बांमलाक धक्का लाःगु खः । जिएसएं बाइडनया टिमयात शपथ ग्रहणया प्रक्रिया सुरु यायेगु धकाः जानकारी बिइवं ट्रम्पं नं ट्वीट यानाः थुकिया जानकारी बिउगु खः । ट्रम्पं नियुक्त यानातःम्ह प्रशासक इमिली मर्फीं राष्ट्रपति निर्वाचिन बाइडनया निंतिं ६३ लाख डलरया कोष उपलब्ध याकेगु खँ धयादीगु खः । वय्कलं सत्ता हस्तान्तरण प्रक्रिया लिबाकेगु निंतिं ह्वाइट हाउसपाखें छुं दबाब मवःगु खँ नं धयादीगु दु ।

ट्रम्पयात मछिंका बिउगु मिशिगन राज्यय् मत परिणाम घोषणायात अन्तिम रुप बीगु निंतिं सही यायेमाःपिं निम्ह रिपब्लिकन मध्ये छम्हेसिनं थनया परिणाम स्वीकार यायेवं औपचारिक रुपं थनया मतपरिणाम वःगु खः । रिपब्लिकनया मेम्ह छम्हेसिनं धाःसा थ्व प्रक्रियां पिहां वःगु खः । ट्रम्पया कानुनी पुचलं धाःसा अझं नं मिशिगनया लिच्वःयात कयाः चुनौती बीगु खँ धयाच्वंगु दु ।

थ्वहे दथुइ जनवरी २० तारिखय् शपथ ग्रहण यानादीत्यंम्ह बाइडेनं थःगु सरकारय् प्रमुख कार्यभार काइपिं मनूतय्त ल्ययेगु सुरु यानादीगु दु । वय्कलं पुलांम्ह विदेशमन्त्री जोन केरीयात जलवायुसम्बन्धी विशेष दूत दयेकीगु जूगु दु । प्यदँ न्ह्यव अमेरिकाया पाखें केरीं हे पेरिस सम्झौताय्ह स्ताक्षर यानादीगु खः । तर लिपा ट्रम्पं अमेरिकायात थ्व सम्झौता पाखें पिहां अलग यानागु घोषणा यानाबिउगु खः । बाइडेनं थ्वयां न्ह्यव हे विदेशमन्त्रीइ एन्टोनी ब्लिबकेनयात नियुक्त यायेगु खँ धायेधुंकूगु दु। वय्कः अन्तर्राष्ट्रियरुपं बांलाःगु छवि दुम्ह खः ।