पशुपति विकास कोषय् पीन्यान्हु न्ह्यनिसें धर्ना
सम्झौता कथं गोठाटारय् जग्गा बीत तिलगंगाबासीतय् माग
येँ (नेपालभाषा टाइम्स) – पशुपति क्षेत्र विकास कोषया गुरुयोजना कार्यान्वयनया झ्वलय् थःपिंत सरकारं अन्याय याःगु धासें वंगु पीन्यान्हु निसें स्थानीयवासिन्दा धर्ना च्वनाच्वंगु दुसा कोषं धाःसा वास्ता यानाच्वंगु मदु । बालेन साह नेतृत्वया सरकार वयेधुंकाः थीथी थासय्या बस्ती थुनेगु झ्वलय् तिलगंगा क्षेत्र (ब्लक बी १३) य् लाःगु स्थानीय बासिन्दाया छेँ नं थुनाबिउगु खः ।
स्थानीय बासिन्दात थःपिं सुकुम्बासी मखुसां नं सरकारं सुकुम्बासीयात थें व्यवहार यानाः थःपिनिगु अधिकार हनन याःगु धासें पशुपति क्षेत्र विकास कोषया लुखाय् धर्ना च्वनावयाच्वंगु खः ।
स्थानीय सुदर्शन गौतमं थःपिं सुकुम्बासी मखुसे राज्ययात कर पुलाः वैधानिक रुपय् च्वना वयाच्वनागु खँ कनादीगु दु । गौतमया कथं वंगु छुं न्हिं न्ह्यः संस्कृति, पर्यटन तथा नागरिक उड्डयन मन्त्री लिसे जूगु सहलहया झ्वलय् प्रभावित पक्षपाखें माःगु भ्वं व सम्झौताया प्रमाण हाकनं बियागु खँ धयादीगु दु ।
उगु इलय् मन्त्रीं घटनाया बारे माक्व जानकारी मदुगुलिं छेँ थुंगु धासें सम्बन्धित भ्वं माग यानादीगु खँं वय्कलं जानकारी बियादीगु खः । गौतमं सञ्चारकर्मीत लिसे खँ ल्हायेगु झ्वलय् धयादिल, ‘जिमित जग्गा बीमखु धइगु खँ जुइ हे फइमखु । जिपिं सुकुम्बासी वा अथें वयाः सरकारी जग्गा मिचे यानाः च्वं वयापिं मखु । जिपिं ला लालपूर्जा कयाः व भवन निर्माण सम्पन्न यानाः वडा कार्यालयय् कर पुलाः च्वंच्वनापिं स्वाभिमानी नेपाःमि खः । यदि गुरुयोजना माने यायेगु खःसा गोठाटारय् जिमित जग्गा बीमाल, छाय् धाःसा जिपिं ला थनं मेथाय् च्वनेत राजी जुयापिं खः । यदि गुरुयोजना लागु यायेगु मखुसा सरकारं जिपिं च्वना वयाच्वनागु छेँ थुं गुया छुं अर्थ मदु ।’
थ्वहे झ्वलय् ८ वडाया अध्यक्ष आशामान संगतयात ‘ने पालभाषा टाइम्सं’ तिलगंगाया अवस्था बारे न्यनागु न्ह्यसलय्, ‘थ्व बारे सरकार याके हे न्यंसा बांलाइगु’ खँ धयादिल ।
वय्कलं थम्हं संस्कृति, पर्यटन तथा नागरिक उड्डयन मन्त्रीयात नापलाये गु कुतः यानागु खःसां ई हे मबिउगु खँ धयादीगु दु । लिसें वय्कलं धयादिल, ‘स्थानीय जनताया समस्या ज्यंकेत सरकारयात खास हे समस्या मदु । न्हापा हे निर्णय जुयाच्वे धुंकूगु विषय खः । उकियात कार्यान्वयन यायेत थाकूगु विषय नं मखु ।’
वय्कलं तिलगंगाया समस्यायात कयाः सांसदत लिसे खँ जुयाच्वंगु जानकारी बिसें पशुपति क्षेत्र विकास कोषं बैठकय् तकं थःत मसःतूगु खँ धयादीगु दु । वय्कलं धयादिल, ‘पशुपति क्षेत्र विकास कोषया जि नं दुजः खः । तर कोषया बैठकय् जितः मसःतू । जिं विरोध याइ धकाः ला ? छु खः मसिउ ।’
वय्कलं नं तिलगंगाय् च्वनाच्वंपिं जनता मेथासं वयाः च्वंवःपिं मखसे स्थानीय बासिन्दा जूगु व गुरुयोजना कथं पशुपति क्षेत्र विस्तार यायेगु निंतिं स्थानीय वासिन्दायात गोठाटारय् स्थानान्तरण यायेगु सम्झौता जूगु खँ कनादीगु दु ।
LEAVE YOUR COMMENTS