ने. सं. ११४६ तछलाथ्व चौथी -

कन्हसंनिसें त्वाः त्वालय् संकिपा महोत्सव

येँ (नेपालभाषा टाइम्स) – येँ महानगरपालिकां कन्हसंनिसें त्वाः त्वालय् संकिपा महोत्सव याइगु जूगु दु । महानगरपालिकां कन्हय् असार ५ निसें २६ गते तक शुक्रवाः व शनिवाःपतिकं त्वाः त्वालय् संकिपा महोत्सव यायेत्यंगु खः ।

येँ महानगरपालिकाया कार्यवाहक प्रमुख सुनिता डंगोलं संकिपा महोत्सवया जानकारी बीगु ल्याखं ग्वसाः ग्वःगु पत्रकार सम्मेलनय् थ्व सम्बन्धी जानकारी बियादीगु खः । लिसें उगु इलय् वय्कलं महोत्सवया लोगो नं सार्वजनिक यानादीगु खः ।

कार्यवाहक प्रमुख डंगोलं आकिवं ग्वसाः ग्वयेगु लक्ष्य कयातःगु अन्तर्राष्ट्रिय संकिपा महोत्वयात लक्षित यानाः त्वाः त्वालय् संकिपा महोत्सव यायेत्यनागु जानकारी बियादिल । नियमित रुपं संकिपा महोत्सव याना वयाच्वंगु निफ, किम्फ, मानव अधिकार संकिपा महोत्सव थेज्याःगु ज्याझ्वःया ग्वसाः खलः, संकिपा ख्यःलिसे सम्बन्धित संघसंस्था व पेशाकर्मीलिसेया समन्वय व सहकार्यय् महोत्सव यायेगु जुइ,’ कार्यवाहक प्रमुख डंगोलं धयादीगु दु ।

महानगरपालिकाया प्रवक्ता नविन मानन्धरं थ्व विधा राष्ट्रिय व अन्तर्राष्ट्रिय बिस्कं संस्कृति, अवस्थिति व परिस्थितियात थवंथवय् सतिक हयेगु, साझेदारी व विचाःकालबिलयात प्रोत्साहन याइगु शसक्त माध्यम खः धयादिल ।

प्रवक्ता मानन्धरया कथं येँ महानगरपालिकां २०८० कात्तिक १४ गते युनेस्को क्रियटिभ सिटीज नेटवर्कय् संकिपा विधापाखें सदस्यता प्राप्त याये धुंकाः रचनात्मक उद्योगलिसे स्वानाः संकिपालिसे सम्बन्धित ज्या याये त्यंगु खः । ‘थ्व महो त्सवया शुरुवात खः । थुकियात अन्तर्रष्ट्रिय संकिपा महोत्सवलिसे स्वाकाः क्वचायेकेगु जुइ,’ प्रवक्ता मानन्धरं धयादिल ।

थ्व हे झ्वलय् महोत्सवया निंतिं स्थानीय व्यवस्थापन यायेत च्यागू संस्था छनोट याःगु दुसा स्वंगू वैकल्पिक धलखय् दुथ्याकातःगु दु । सम्पदा तथा पर्यटन विभागं आह्वानकथं पेश जूगु २० गू प्रस्तावया मूल्यांकनपाखे व्यवस्थापनय् ज्या याइगु संस्था छनोट जूगु विभागं जानकारी बिउगु दु ।

वइगु असार ५ गते चकं दबू (खुल्लामञ्चं) महोत्सव शुरु जुइगु महोत्सवया व्यवस्थापन ‘इको ज इन द भ्याली’ नांया संस्थां याइ । ६ गते असनय् ज्याझ्वः जुइ । वाःया निन्हु शुक्रवाः व शनिवाःपतिकं जुइगु ज्याझ्वः ल्हुति (बाइपास लागा), बागबजाः, भाष्कर कीर्ति महाविहार (यतखा), लगं, मय्‌ति द्यःया खुल्ला चौरय् महोत्सव संचालन जुइ ।

महोत्सवय् चीहाः संकिपा, संकिपा प्रदर्शनया निंतिं एलईडी, साउण्ड सिस्टम, क्यरेटर लगायत ग्वहालि विभागं उपलब्ध याइ । महोत्सवया व्यवस्थापन छनोट जूगु स्थानीय संघसंस्थां याइ ।