सुडानय् ‘सैन्य कू’ विरुद्ध प्रदर्शन, न्हय्म्ह सित

एजेन्सी-सुडानय् सोमवाः सेनां याःगु ‘कू’ विरुद्ध प्रदर्शन जूगु दु । सेनां प्रदर्शन यानाच्वंपित गोलीं कयेकूगु दुसा गोलीं लानाः न्हय्म्ह मनू सीगु दु । घटनाय् १४० म्हं मल्याक मनूत घाःपाः जूगु धाःगु दु । सेनां सतकय् कुहां वयाः प्रदर्शन याःवःपिं प्रदर्शनकारीतय्त छेँय् छेँय् वनाः हे ज्वनाच्वंगु दु । सुडानया राजधानी खार्तुम व थीथी शहरय् द्वलंद्वः मनूत सेनाया विरोधय् सतकय् कुहां वःगु खः ।

प्रदर्शनकारीतय्सं लँय् पंगः थनाः विरोध यासें ‘सैन्य शासन म्वाः’ धकाः नारा थ्वयेकूगु खः । सुडानया केन्द्रीय बैंकया कर्मचारीतय्सं नं विरोध यासें ज्या दिकूगु दुसा डाक्टरतय्सं नं सेनाया अस्पतालय् आकस्मिक सेवा बाहेकया ज्या मयायेगु धाःगु दु ।

सुडानय् सोमवाः सेनां ‘कू’ यानाः सत्ता ल्हातय् काःगु खः । अन्तर्राष्ट्रिय सञ्चार माध्यमया कथं सेनां प्रधानमन्त्री अब्दुल्लाह हमदोकलिसें सुडानया मन्त्रीत, वरिष्ठ अधिकारी ,गभर्नर व नेतातय्त नियन्त्रणय् काःगु खः । सेनां सुडानय् संकटकालया घोषणा नं यायेधुंकूगु दु । अथे हे सेनां इन्टरनेट व टेलिफोन नं बन्द याःगु दुसा अन्तर्राष्ट्रिय विमानस्थल नं बन्द यानातःगु दु । संकटकालया घोषणा यायेधुकाः सेना प्रमुख जनरल अब्देल फतह अल बुरहानं राजनीतिक ल्वापुया कारणं सैन्य कारवाही यानागु धाःगु दु । सेना प्रमुख जनरल बुरहानं सन् २०२३ या जुलाइलय् चुनाव यायेगु व निर्वाचित सरकारयात सत्ता हस्तान्तरण यायेगु बचं बिउगु दु ।

सुडानय् जूगु ‘कू’यात कयाः विश्वन्यकं विरोध जुयाच्वंगु दु । अमेरिकां सुडानयात बियावयाच्वंगु ७० करोड डलर ग्वाहालि दिका बिउगु दु । बेलायत, युरोपेली संघ, संयुक्त राष्ट्र संघ व अफ्रिकन युनियनं नं ‘कू’या विरोध याःगु दुसा सेनां ज्वंपिं दक्व नेतातय्त त्वःतेत इनाप नं याःगु दु ।