हंगकंगय् २० लाख प्रदर्शनकारी सतकय्, लामया राजीनामा माग

हंगकंगय् अभियुक्त सुपुर्दशी सन्धी सम्बन्धी विधेयक स्थगित काःसां अझं प्रदर्शन धाःसा दिउगु मदुनि । हंगकंगया प्रमुख कार्यकारी क्यारी लामं विधेयक स्थगित यायेगु घोषणा याःसां प्रदर्शनकारीतय्सं आइतवाः नं सतक कब्जा याःगु दु । प्रदर्शनकारीतय् दावी कथं आइतवाः २० लाख प्रदर्शनकारीत सतकय् वःगु खः ।

यदि थ्व दावी सत्य जुल धाःसा हंगकंगया इतिहासय् हे आःतकया दकलय् तःधंगु प्रदर्शन जुइ । प्रहरीं धाःसा आइतवाःया प्रदर्शनय् थ्यंमथ्यं साढे ३ लाख जक प्रदर्शनकारी दुगु खँ धाःगु दु । थ्व विधेयकय् हंगकंगया अभियुक्तयात मुद्दाया पुर्पक्षया निंतिं चीनय् सुपुर्दर्गी यायेदइगु व्यवस्था यानातःगु दु ।

थ्व व्यवस्थायात कयाः हे तच्वःगु विरोध जूगु खः । आइतवाः जूगु प्रदर्शन लिपा नं यक्व हे प्रदर्शनकारीत चच्छि सतकय् हे च्वनाच्वंगु खँ धाःगु दु । उमिसं थाय्थासय् सतकय् पंगः नं तयाबिउगु खः । अथे खःसां वातावरण धाःसा शान्त हे दुगु खँ प्रहरीं धाःगु दु । थ्वयां न्ह्यव बुधवाः जूगु प्रदर्शनय् प्रहरीं रबरया गोलीं कयेकूगु खः ।

शनिवाः जूगु प्रदर्शनय् धाःसा छम्ह प्रदर्शनकारी दयाः सीगु खः । आइतवाःया प्रदर्शनय् वया सम्मानय् प्रदर्शनकारीतय्सं तुयुगु स्वां ज्वनाः वःगु खः ।थ्व प्रदर्शन तच्वयेवं हंगकंगया अधिकारीतय्सं विधेयक स्थगन यानागु घोषणा याःगु खः । प्रदर्शनकारीतय्सं धाःसा विधेयक लित हे कायेमाःगु माग यानाच्वंगु दु ।

हंगकंगया नेतृ लामं विधेयक प्रस्ताव यानागु खँय् क्षमा नं फ्वनेधुंकूगु दु । तर हंगकंगय् चिनिया प्रभाव अप्वयेकेत्यंगु धासें प्रदर्शनकारीतय्सं लामया राजीनामा नं माग यानाच्वंगु दु ।

छम्ह ६७ दँया प्रदर्शनकारी मालें बिबिसीलिसे खँ ल्हासें धाःगु दु, ‘क्यारी लामं हंगकंगवासीया इच्छा आकांक्षायात बेवास्ता यानाच्वंगु दु । ’
थ्वहे दथुइ न्यादँ न्ह्यव जूगु ‘कुसा आन्दोलन’या न्ह्यलुवा विद्यार्थी नेता जोशुवा वोङयात नं सोमवाः त्वःतूगु दु । वं नं क्यारीया राजीनामा माग याःगु दु ।

सम्बन्धित बुखँ

LEAVE YOUR COMMENTS