युवराजपाखें संन्यास घोषणा

भारतया विस्फोटक ब्याट्सम्यान युवराज सिंहं अन्तर्राष्ट्रिय क्रिकेटं संन्यास काःगु दु । मुम्बइया साउथ होटलय् छगू पत्रकार सम्मेलन यासें सिंहं संन्यासया घोषणा याःगु खः । ३७ दँया युवराज सिंहं भारतया निंतिं वंगु २०१७ जून ३०य् अन्तिम एकदिवसीय क्रिकेट म्हितूगु खः । अथेहे २०१७ फेब्रुअरी १य् इंग्ल्यान्ड विरुद्ध अन्तिम टि २० कासा म्हितूगु खःसा २०१२ डिसेम्बरय् इंग्ल्यान्ड विरुद्ध टेस्ट म्याच म्हितूगु खः ।

निदँ तक भारतया निंतिं छुं हे कासा म्हितेमखंम्ह युवराजं म्हिगः जक अन्तर्राष्ट्रिय क्रिकेटं संन्यासया घोषणा य ाःगु खः । युवराजं थःगु अन्तर्राष्ट्रिय क्रिकेट क्यारियरया झ्वलय् २०११य् विश्वकप त्याकूगु दु ।

थःगु संन्यासया घोषणा ज्याझ्वलय् न्ववासें युवराजं २०११ विश्वकप त्याकागु, २००७ य् टि ट्वान्टी कासाय् छगू ओभरया खुगू बलय् खुगू हे छक्का थ्वानागु व २००४ य् न्हापांगु टेस्ट सतक थ्वानागु खँ थःगु लुमंकेबहःगु कासा जूगु खँ धाःगु खः ।