बार्सिलोना त्यात, रियल बराबरीइ

म्याड्रिड दर्बी एथलेटिको म्याड्रिड लिसे बराबरीइ म्हितूसां रियल म्याड्रिड ला लिगाया ल्याः धखलय् शीर्षस्थानय् हे लाःगु दु । म्हिगः जूगु कासाय् निगुलिं टिमं गोल यायेमफयेवं कासा बराबरीइ क्वचाःगु खः । थ्व कासा लिपा रियल म्याड्रिडया न्हय्गू कासा म्हिताः १५ ल्याः दु । बराबरीइ म्हितूगु एथलेटिकोया १ ल्याः म्हो जूगुलिं ग्रानाडा लिसें निगूगु थासय् दु ।

बार्सिलोनायात स्तब्ध याना वःगु ग्रानाडा म्हिगः लेगानेसयात १–० गोलं बुकाः १४ अंक सहित निगूगु थासय् थहां वःगु खः । बार्सिलोनां नं म्हिगः गेटाफेयात २–० गोलं बुकाः स्वंगूगु थासय् थहां वःगु खः । बार्सिलोनाया आः शीर्षस्थानय् लानाच्वंगु रियलया स्वयां २ अंक जक म्हो दु ।

रियल व एथलेटिको दथुया कासा म्हिगः रियलया डिएगो कोस्टा, गारेथ बेलं गोलया निंतिं बांलाःगु प्रहार याःगु खःसां गोल जुइमफयेवं कासा बराबरीइ क्वचाःगु खः ।

मेखे बार्सिलोनाया निंतिं लुइस स्वारेज व जुनियर फिर्पो छगू छगू गोल यासें विजय चूलाकाबिउगु खः । स्वारेजं कासाया ४१ औं मिनेटय् न्हापांगु गोल याःगु खःसा निगूगु हाफ सुरु जूगु प्यंगू मिनेट लिपा फिर्पों अग्रता निदुगं यानाबिउगु खः । कासाया च्यागू मिनेट ल्यः दनिबलय् धाःसा बार्सा झिम्हय् सीमित जूगु खः । बार्साया क्लेमेन्ट लेंग्लेटयात निगूगु म्हासुगु कार्ड क्यँसें मैदानं पिने छ्वःगु खः ।

सम्बन्धित बुखँ

LEAVE YOUR COMMENTS