बक्सिङ व जुडोय् नेपाः फाइनलय्

येँ – झिंस्वक्वःगु दक्षिण एशियाली कासा अन्तर्गत आइवाः जूगु बक्सिङय् नेपाःया न्याम्ह मिसा बक्सरत फाइनलय् दुहां वंगु दु । नेपालं ४८ केजी तौल समूहय् ललिता महर्जन, ५४ केजी तौल समूहय् मिनु गुरुङ, ५९ केजी तौल समूहय् माला राई, ६० केजी तौल समूहय् संगीता सुना व ६४ केजी तौल समूहय् पुनम रावल फाइनलय् थ्यंगु खः ।

अथेहे मिजंतय् पाखे नं निम्ह बक्सर फाइनलय् थ्यंगु दु । ९१ केजी तौल समूहय् आशिस दवाडी व ६४ केजी तौल समूहय् भुपेन्द्र थापामगर फाइनलय् दुहां वंगु खः। थ्व लिपा नेपाःया निंतिं बक्सिङय् न्हय्गू रजत पक्का जूगु दु । नेपालं दक्षिण एशियाली कासाय् आःतक मुक्कं स्वंगू जक कास्य त्याकातःगु दु ।

मिजंतय्पाखे सुशिल थापामगर, पुर्ण राइ व अर्जुन सिगुं कास्य पदक त्याकातःगु खः । जुडोय् निम्ह फाइनलय् आइतवाः जूगु जुडो धेंधेंबल्लाखय् इन्द्रबहादुर श्रेष्ठ व सन्जित डंगोल थःथःगु तौल समूहय् फाइनलय् दुहां वंगु दु । श्रेष्ठ ६६ केजी तौल समूहय् पाकिस्तानया हसनयात १–०या ल्याखं बुकसें फाइनलय् दुहां वंगु खःसा डंगोल ७३ केजी तौल समूहय् इस्लाम अमिरुलयात बुकुसें फाइनलय् दुहां वंगु खः ।

नेपाली सेनाया लगंख्यलय् च्वंगु कभर्ड हलय् आइतवाः निसें जुडो कासा सुरु जूगु खः । मिस्तय् क्रिकेटय् बंगलादेशयात स्वर्ण मिस्तय् क्रिकेटय् बंगलादेशं श्रीलंकायात २ रनं बुकुसें स्वर्ण त्याकूगु दु । पोखराय् जुयाच्वंगु टि–२० कासाय् बंगलादेशं निर्धारित २० ओभरय् ८ विकेटया क्षतिइ ९१ रन दयेकूगु खः ।

९२ रनया लक्ष्य ज्वना वःगु श्रीलंकाया टिम मुक्कं ८९ रनय् अल आउट जुल । अन्तिम ओभरय् श्रीलंकायात ७ रन माःगु दु, तर ४ रन जक दयेकूबलय् ल्यंदुपिं निम्हं ब्याट्सम्यान रनआउट जुइवं बंगलादेशं उपाधी त्याकूगु खः । थ्व धेंधेंबल्लाखय् नेपालं कास्य त्याकूगु खः ।

सम्बन्धित बुखँ

LEAVE YOUR COMMENTS