ने. सं. ११४६ दिल्लाथ्व तृतीया -

खुगू प्रदेशय् सत्ता हिलीगु सम्भावना

कर्णालीइ मुख्यमन्त्रीविरुद्ध अविश्वासया प्रस्ताव, सुदूरपश्चिमय् राजीनामा फ्वन

येँ (नेपालभाषा टाइम्स) – नेपाली कांग्रेस व एमाले दथुइ कायम जुयाच्वंगु सत्ता गठबन्धन स्यनेवं म्होतिं नं खुगू प्रदेश न्हूगु सरकार दयेकेगु तयारी न्ह्याःगु दु । कांग्रेसं एमालेयात बियाच्वंगु समर्थन त्वाथलेवं मधेश प्रदेश बाहेक मेगु खुगू प्रदेशय् न्हूगु सरकार नीस्वनेगु निंतिं गृहकार्य न्ह्याःगु खः । कांग्रेस एमाले निगुलिं पार्टीं नेपाली कम्युनिष्ट पार्टी लिसे सरकार नीस्वनेगु निंतिं वार्ता न्ह्याकूगु दु । नेकपां कांग्रेस वा एमाले छगू पार्टीयात तिबः बिल धाःसा न्हय्गुलिं प्रदेशय् न्हूगु सरकार नीस्वनेफइगु स्थिति दु । अथे खःसां मधेस प्रदेशय् धाःसा गठबन्धन त्वामथलेगु खँ स्वंगुलिं पार्टीं धायेधुंकूगु दु ।

थ्व झ्वलय् कर्णालीइ मुख्यमन्त्री यामलाल कँडेलविरुद्ध प्रदेश सभाय् अविश्वासया प्रस्ताव दर्ता जूगु दु । नेकपाया न्याम्ह व कांग्रेसया झिंछम्ह सांसदत यानाः झिंखुम्हेसिनं अविश्वासया प्रस्ताव दर्ता याःगु खः । थन कांग्रेसया जीवन शाहीया नां मुख्यमन्त्रीया निंतिं प्रस्ताव याःगु दु ।

अथेहे सुदूरपश्चिम प्रदेशय् नेकपां मुख्यमन्त्री कमलबहादुर शाहया राजीनामा फ्वंगु दु । एमालें शाहयात बियातःगु समर्थन लित कायेवं सरकार अल्मतय् लाःगु दु ।

सरकारय् दुथ्याःगु एमालें आर्थिक दँ २०८३/८४ या बजेट पारित यायेत ग्वाहालि मयायेवं मुख्यमन्त्री कमल शाहं एमालेया प्यम्ह मन्त्रीतय्त वंगु बुधवाः बर्खास्त याःगु खः । वयां लिपा एमालें बियातःगु समर्थन लित काःगु खः ।

कांग्रेस एमाले गठबन्धन स्यनेवं बागमति प्रदेशय् नं सत्ता समिकरण हिलीगु जूगु दु । थौंकन्हय् बागमति प्रदेशय् कांग्रेस नेतृत्वया सरकार दुसा एमालें थः मन्त्रीतय्त लित सतेगु तयारी यानाच्वंगु दु । एमालें बागमति प्रदेशय् बामपन्थी सरकार नीस्वनेत प्रमुख प्रतिपक्षी दल नेकपायात प्रस्ताव यानाच्वंगु दु । तर नेकपां धाःसा थःगु हे नेतृत्वय् सरकार दयेकेगु खँ धयाच्वगु दु ।

नेकपाया नेता शालिकराम जम्कट्टेलं ‘एमालें थःपिं लिसे जानाः वाम गठबन्धनयात न्ह्यःने न्ह्याकेत इनाप याःगु खँ न्ह्यथँसें धयादीगु दु, ‘आः सरकार हिलीगु अवस्था जुल धाःसा जिमिसं मेपिंत समर्थन यायेगु जुइमखु जिमिगु हे नेतृत्वय् सरकार नीस्वनेगु जुइ ।’

नेकपाया नेता गंगानारायण श्रेष्ठं धाःसा पार्टी संयोजक पुष्पकमल दाहाल श्रीलंकां लिहां वयेधुंकाः जक छु पार्टी लिसे जानाः सरकार नीस्वनेगु धयागु बारे निर्णय जुइगु खँ धयादीगु दु । वय्कलं ‘नेपालभाषा टाइम्स’ लिसे खँ ल्हासें धयादिल, ‘गठबन्धन यायेत स्वंगू पार्टी जानाः यायेगु कि निगू पार्टी जानाः यायेगु धइगु निर्णय मजूनि । थौंकन्हय् पार्टी संयोजक विदेश भ्रमणय् दी । वय्कः लिहां झायेधुंकाः जक गुकथं वनेगु धयागु निर्णय जुइ ।’

नेकपां फुक्कं राजनीतिक दल दथुइ सहकार्य यानाः प्रदेश सरकार नीस्वनेमाःगु खँ धायेगु याना वयाच्वंगु दु । वंगु फागुन २१ गतेया प्रतिनिधिसभा चुनावय् पुलांगु पार्टीत बांमलाक्क बूगु कारणं नेकपां कांग्रेस, एमाले, मधेशवादी पार्टी जानाः सरकार नीस्वनेमाःगु खँ धायेगु यानाच्वंगु दु । तर नेपाली कांग्रेसया सभापति गगन थापां धाःसा बहुमत दुगु स्वंगू पार्टी जानाः सरकार दयेकलकि प्रतिपक्षी धयागु हे मदइगुलिं थुकथं सरकार नीस्वने मजिउगु खँ धयाच्वनादीगु दु ।

कांग्रेस सभापति गगन थापा व एमाले अध्यक्ष केपी ओली दथुइ विवाद ब्वलंगुलिं प्रदेशय् सत्ता गठबन्धन क्वःदलीगु अवस्थाय् थ्यंगु खः ।