इजरायलय् नाफ्ताली बेनेट न्हूम्ह प्रधानमन्त्री

एजेन्सी- इजरायली प्रधानमन्त्री बेन्जामिन नेतान्याहु १२ दँ लिपा सत्तां पिने लाःगु दु । इजरेली संसद्ं प्रधानमन्त्री कथं दक्षिणपन्थी राष्ट्रवादी नेता नाफ्ताली बेनेटयात प्रधानमन्त्री ल्ययेवं नेतान्याहुया ताःहाकःगु शासनकाल क्वचाःगु खः । बेनेटं सोमवाः हे ‘हिउपाःया निंतिं वःगु सरकार’या नेतृत्व यासें शपथ ग्रहण यानादीगु दु ।

संसदय् जूगु चुनावय् बेनेट मुक्कं छगू मतं जक त्यानाः गठबन्धन सरकारया प्रधानमन्त्री जूगु खः । मतदानय् बेनेटयात ६० मत वःगु खःसा नेतान्याहुयात ५९ मत वःगु खः ।

न्हूगु सरकारया निंतिं जूगु गठबन्धनया सहमति कथं बेनेट वइगु २०२३ या सेप्टेम्बर तक जक प्रधानमन्त्री जुयादी । थ्व येश अटिड पार्टीया नेता लाएर लापिड मेगु निदँया निंतिं प्रधानमन्त्री जुयादी ।
इजरायलय् आःतक दकलय् अप्वः ई तक प्रधानमन्त्री जुयादीम्ह नेतान्याहुं संसदय् न्ववासें जिपिं हाकनं लिहां वये तिनि धयादीगु दु ।

ताःई लिपा सत्तां पिने लाःसां नेतान्याहुं आः नं सुम्क धाःसा मच्वनीगु खँ धाःगु दु । वय्कलं आः न्हूगु सरकार दयेकेत जूगु गठबन्धन त्वाःथलेगु कुतः यानाः थःगु न्हूगु गठबन्धन दयेकेगु तयारी याइगु अनुमान दु । न्हूगु सरकारया गठबन्धनय् तःगू बिचारधारायापिं तःगू पार्टी दुगुलिं थ्व गठबन्धन ताःई तिके मजुइगु नेतान्याहुया विश्वास दु ।