ब्रेकअप धुंकाः नं नापं फिल्म म्हितूपिं

नापं फिल्म म्हितीबलय् छम्ह हिरो व छम्ह हिरोइन दथुइ यःत्यः जुइगु धइगु न्हूगु खँ मखु । हलिउड बलिउडय् जक मखसे नेपालय् नं अथे जू । थथे यःत्य जुइ धुंकाः इमि दथुइ इहिपा जूगु दसु नं दुसा गुलिं गुलिं मतिनाया यात्रा दथुलँय् हे त्वाःदःपिं नं दु । थौंकन्हय्या भासं थुकियात ‘ब्रेकअप’ जूगु धाइ । थथे ब्रेकअप जुइ धुंकाः थःथःगु लँपु लिना वनीगु धइगु न्हूगु खँ मखु ।

छम्ह लिसे ब्रेकअप धुंकाः मेम्ह लिसे हाकनं लभ अफेयर नं न्ह्यायेफु वा मेम्ह लिसे इहिपा यानाः तिपू जीवन नं हनेफु । थुलि बाहेक नं छुं छुं स्टारतसें धाःसा थःगु फिल्म यात्रा न्ह्याकेगु झ्वलय् हाकनं थः न्हापायाम्ह मतिनामिलिसे हे फिल्म म्हितूगु दु । बलिउडया फिल्मख्यःया चर्चा यायेगु खःसा उकिया दकलय् न्हूगु दसु धइगु थुगुसी पिदंगु “कलंक” फिल्मयात कायेजिउ ।

तःदँ लिपा हाकनं फिल्मय् खनेदयेक वःम्ह माधुरी दीक्षित थ्व “कलंक” फिल्मय् सञ्जय दत्तया हिरोइन जुयाः म्हितातःगु खनेदत । नीन्यादँति न्हापा “थानेदार” फिल्मया इलय् सञ्जय व माधुरी दथुया मतिनाया बाखं तसकं बय्बय् जूगु खःसा उमि दथुइ इहिपा हे जुइगु तकं खँ पिहां वःगु खः तर अथे मजुल । इमि दथुइ बाय्भु वल, यानिकि ब्रेकअप जुल ।

थथे ब्रेकअप धुंकाः नीदँ लिपा हाकनं छक्वः इपिं नापं “कलंक” फिल्मय् म्हितल । थ्व हे “कलंक” फिल्मय् नापं म्हितूपिं वरुण धवन व आलिया भट्ट दथुइ नं “स्टुडेण्ट अफ इयर” म्हितूगु इलय् यःत्यः जूगु खँ पिहां वःगु खःसा लिपा वनाः दथुइ ब्रेकअपया खँ नं पिहां वल । अनं लिपा थःथःगु लँपु लिनाच्वंपिं वरुण व आलियाया जोडी हाकनं छक्वः “कलंक” फिल्मय् नापं खनेदयेकः वल ।

आलिया भट्टया नां थौंकन्हय् बलिउडया यंगस्टार रणवीर कपुरलिसे स्वाना वयाच्वंगु दु । थ्वसिबें न्हापा रणवीर कपुरया नां दिपिका पादुकोने व क्याट्रिना कैफलिसे नं स्वाये धुंकल । दिपिका व क्याट्रिनालिसे रणवीरया इहिपा जुइथेंज्याःगु हुइनाभुइना नं जुल, तर अथे मजुल ।

सलमान खानलिसे फिल्म म्हितूबलय् क्याट्रिना कैफया क्यारियर गुलि थहां वंगु खः उलि ला शाहरूख खानलिसे “जब तक है जान ” व “जिरो” अले आमिर खानलिसे “धुम थ्री” व “ठग्स अफ हिन्दुस्तान” म्हितूबलय् नं थहां वयेमफुत ।उकिं हे जुइ क्याट्रिनां हाकनं सलमान खानलिसे हे फिल्म म्हितेगु यानाहल ।

दिपिका पादुकोनं लिपा मेम्ह रणवीर यानिकि रणवीर सिंह लिसे मतिनाया स्वां ह्वयेकल, अले वलिसे हे इहिपा यानाः तिपू जीवन हनाच्वंगु दु । थथे थवंथवय् बाय्भू वयेधुंकाः नं उमिसं “ये जवानी हे दिवानी” नांयागु फिल्म म्हितल । थ्व फिल्म हिट नं जुल तर व धुंकाः लिपा हाकनं नापं म्हितूगु “तमाशा” हिट मजुल ।

अथे हे तुं क्याट्रिनालिसे नं ब्रेकअप धुंकाः रणवीर कपुरं “जग्गा जासुस” नांयागु फिल्म म्हितल, तर थ्व फिल्म धाःसा फ्लप जुल । क्याट्रिना कैफया छगू इलय् बलिउडया सुपरस्टार धकाः बयबय् यानातःम्ह सलमान खानलिसे नं यःत्यः जूगु खः । उमिगु मतिनाया बाखंया चर्चा नं यक्व हे जुल ।

छुं ई मतिनाया स्वां ह्वयेकाच्वंपिं सलमान व क्याट्रिना दथुइ नं लिपा बाय्भू वल अले थःथःगु हिसाबं फिल्म म्हितेगु यात । सलमान खानलिसे फिल्म म्हितूबलय् क्याट्रिना कैफया क्यारियर गुलि थहां वंगु खः उलि ला शाहरूख खानलिसे “जब तक है जान ” व “जिरो” अले आमिर खानलिसे “धुम थ्री” व “ठग्स अफ हिन्दुस्तान” म्हितूबलय् नं थहां वयेमफुत ।

उकिं हे जुइ क्याट्रिनां हाकनं सलमान खानलिसे हे फिल्म म्हितेगु यानाहल । उपिं निम्हेसिनं नापं म्हितूगु दकलय् लिपांगु फिल्म “भारत” खः । थ्व “भारत” फिल्मयात सलमान खानया जीवनया छगू महत्वकांक्षी फिल्मया रूपय् कयातःगु दुसा थ्व फिल्म थुगुसीया इदया लसताय् रिलिज जूगु दु ।

“भारत” फिल्मय् न्हापा प्रियंका चोपडायात हिरोइन कथं साइन याःगु खः तर लिपा प्रियंकां थःगु इहिपाया हुनिं फिल्म लाइन हे त्याग याःबलय् क्याट्रिनायात हिरोइन दयेकूगु खः । थ्वसिबें न्हापा नं सलमान खानलिसे ब्रेकअप धुंकाः क्याट्रिनां सलमानलिसे “एक था टाइगर” व “टाइगर जिन्दा है” नांयागु निगू फिल्म म्हितूगु दुसा निगुलिं फिल्म हिट नं जूगु खः ।

क्याट्रिना व सलमान हाकनं फिल्म म्हितेगु झ्वलय् हाकनं थवंथवय् सतिना वःगु दु धइगु हुइनाभुइना जुयाच्वंगु दु । थुकथं ब्रेकअप लिपा हाकनं फिल्मय् नापनापं म्हितूपिं हिरो हिरोइनय् करिना कपुर व शाहिद कपुरया नां नं थन त्वःफिके मजिउ । “३६ चाइना टाउन” फिल्मय् म्हितूगु इलय् उपिं निम्ह दथुइ यःत्यः जूगु खः ।

अले छुं फिल्ममेकरतसें उमित नापं फिल्मय् नं काल । तर उमिगु मतिना नं ताःतक न्ह्यायेमफुत । उमि दथुइ ब्रेकअप हे जुल । ब्रेकअप जुइधुंकाः नं उमिसं “मिलेंगे मिलेंगे” व “जब वी मेट” फिल्मय् नापं म्हितल अले उकी मध्ये “जब वी मेट” फिल्म ला हिट हे जुल । ब्रेकअप लिपा हाकनं नापं खनेदयेकः वःपिनिगु फिल्म थुकथं हिट हे जूगु दसु नं आपालं हे दुगु खनेदत ।

थज्याःगु हे छगू मेगु दसु अक्षय कुमार व शिल्पा शेट्टीया जोडीया नं खः । “मैं खिलाडी तू अनाडी” थेंज्याःगु हिट फिल्म म्हितूपिं अक्षय व शिल्पां लिपा “इन्साफ” व मेमेगु फिल्मय् नं नापं म्हितलसा उमि दथुइ मतिनाया स्वां नं ह्वल । खय्त ला अक्षय कुमारया रविना टण्डनलिसे नं यःत्यः जूगु खः ।

उमिगु नं फिल्म यक्व हे दु, तर रविनालिसे ब्रेकअप जुइ धुंकाः अक्षय व रविना हाकनं नापं म्हितूगु मदु, बरु शिल्पा शेट्टीलिसे धाःसा ब्रेकअप लिपा “धडकन” नांयागु छगू फिल्म म्हितल । थ्व फिल्म नं हिट हे जुल । ब्रेकअप लिपा नापं म्हितूपिं गुलिसियां फिल्म हिट जूगु खनेदतसा गुलिसियां हिट मजूगु नं दु । थथे हिट मजूपिं धइपिं रणवीर सिंह व अनुष्का शर्माया जोडी खः ।

“ब्याण्ड बाजा बारात” फिल्मय् नापं म्हितुसांनिसें यःत्य जूपिं रणवीर व अनुष्काया मतिनाया बाखं ताःतक न्ह्यानाच्वने मफुत । लिपा वनाः रणवीर सिंहया दीपिका पाडुकोनेलिसे मतिना, जुल अले इहिपा नं जुलसा अनुष्काया विराट कोहली नांयाम्ह क्रिकेट कासामिलिसे मतिना जुल, अले इहिपा नं जुल ।

थथे ब्रेकअप जुइधुंकाः उपिं निम्हं हाकनं “दिल धडकने दो” नांयागु फिल्मय् हाकनं नापं खनेदयेकः वल । उलिजक मखसे उमिसं थ्व फिल्मय् किसिंग सिन व बेडसिन बिइत तकं लिफः मस्वः, तर उमिगु हटसिनं स्वकुमिया नुगः धाःसा क्वाके मफुत । पुलांगु जमानाय् नं अमिताभ बच्चन व रेखा दथुया मतिना व ब्रेकअप छगू तसकं हे चर्चित बाखं खःसा उमिसं नं लिपा वनाः “सिलसिला” फिल्मय् हाकनं नापं म्हितल ।

थ्व फिल्मय् अमिताभ बच्चनया तिरीमय्जु जया भाडुरीं नं म्हितूबलय् अमिताभ–जया–रेखा दथुया लभ ट्रायङ्गल स्वयेदइगु जुल धइगु खँ यानाः तसकं हे बय्बय् ला जुल तर फिल्म पिहां वःबलय् स्वकुमिं आस याःकथंया बाखं थ्व फिल्मय् मखंबलय् स्वकुमि आसां द्यात अले फिल्म फ्लप जुल ।

अमिताभ–रेखाया रि–इन्ट्रि ला फ्लप जक जुल, राजेश खन्ना व डिम्पल कपाडियाया ला हाकनं फिल्म म्हितेगु कुतः पूवने तकं मफुत । उबलय् सुपरस्टार जुयाच्वंम्ह राजेश खन्नालिसे इहिपा जूगु इलय् डिम्पल झिंखुदँया नच्चाम्ह ल्यासे तिनिसा राजेश खन्ना वसिबें निदुगं थकालि । उमिगु इहिपा जूगुया प्यदँ लिपा हे उमि दथुइ बाय्भू वल ।

निम्हं बायाच्वन । डिम्पलं ला हाकनं फिल्म नं म्हितेगु यानाहल । थुलि ईया दुने राजेश खन्नाया क्रेज मदया वने धुंकलसा हाकनं थःत चर्चाय् हयेगु निंतिं राजेश खन्नां थःलिसे डिम्पलयात हे हिरोइन कयाः “जय शिव शंकर” नांयागु फिल्म दयेकेगु ज्या न्ह्याकल । तर राजेश खन्नां मती तः थें थ्व फिल्मं उलि चर्चा कमे याये मफुत । फिल्मया शुटिंग पूवंसां थ्व फिल्मयात सुं नं फिल्म बन्जाःतसें न्यानामकाःबलय् रिलिज तकं जुइ मफुत ।

सम्बन्धित बुखँ

LEAVE YOUR COMMENTS