चीहा संकिपा कासाया लिच्वः पिदन

येँ – नेपाल– भाषा टाइम्स चीहा संकिपा सिरपाःया घोषणा म्हिगः जुल । १६ गू चीहा संकिपा (शर्ट भूमि) दुथ्याःगु उगु कासाय् नेवाः यूट्युब च्यानलं निर्माण याःगु ‘ध्वः छध्वः रेखां क्यूगु’ न्हाप लाःगु दु । उपन्यासकार शशीकला मानन्धरं च्वयादीगु बाखनय् योवन शाक्यया निर्देशनय् उगु चीहा संकिपा दयेकूगु खः ।

म्हिगः बालाजुइ च्वंगु अष्टनारायण हलय् न्हाप ज्याझ्वलय् नांजाःम्ह अभिनेटत्री हिसिला महर्जनं सिरपाः घोषणा यानादीगु खः। न्हाप लाःगु संकिपायात ७५ द्वः तकाया सिरपाः बी । अथे हे किपूया मगन इन्टरटेन्टमेन्टया लुखां दयेकूगु लक्ष्मीकुमार महर्जनं च्वयादीगु व रजिन महर्जनं निर्देशन यानादीगु ‘म्यूजियम’ लियांलिउ लाःगु दु । लिउयात ५०द्वः तकाया सिरपा बी ।

पेजथ्रीपाखें दर्शनवीर शाक्यया निर्देशनय् लोकबाखंया लिधंसाय् दयेकूगु ‘इन्द्रायणी’ व रामकृष्ण खड्गीया निर्देशनय् दयेकूगु ‘स्वार्थ’ लियांलिउ सिरपाः त्याकेत ताःलाःगु खः । लियां लिउ लाःगु निगू संकिपायात म्हतिं २५ द्वः तका सिरपाः बी । आः वइगु निवाःया दुने छगू ज्याझ्वः यासें सिरपाः लिसें सहभागी सकलें संकिपायात दसिपौ व हःपाः दां लःल्हाइगु ग्वसाः दु।