धमाधम इहिपा

फागुन महिना क्वचाल । थुगुसिया इहिपाया लगन नं क्वचाल । थुगुसी नेवाः फिल्म ख्यलय् छुं छुं हिरोइनतय् इहिपा जूगु खनेदत । उकी मध्ये बय्बय् जूगु इहिपा धइगु आशिष्मा नकःमिया इहिपा जुयाबिल । नेपालभाषाया फिल्मय् हिरोइन जुयाः फिल्म यात्रा न्ह्याकूम्ह आशिष्मा नकःमिं खस नेपाली फिल्म नं म्हितल । निगुलिं भासां यानाः करीब निगू दर्जनति फिल्म म्हितूम्ह आशिष्मा नकर्मिं लिपांगु इलय् फिल्म प्रोडक्शनय् पलाः न्ह्याकेगु कुतः याःगु दु । वयागु प्रोडक्शनं दयेकूगु न्हापांगु फिल्म “लाखे भाजु” या शुटिंग क्वचाये धुंकूगु दु । थथे प्रोड्युसर तकं जुयाः फिल्म ख्यलय् थःगु यात्रा ताः ईतक न्ह्याकेगु संकेत क्यंम्ह आशिष्मां इहिपा याइगु जुल धकाः आकाझाकां खँ पिहां वःबलय् आपाःसिनं पत्या तकं मयाः । तर आशिष्माया इहिपा नवीनचन्द्र प्रधाननाप जुल । आशिष्मा नकःमिं इहिपा याःम्ह मिजं नवीनचन्द्र अमेरिकाय् च्वना वयाच्वंम्ह खःसा वय्कःभाजु चार्टर्ड एकाउण्टेन्ट खः ।

आशिष्माया इहिपाया आकाझाकां खँ पिहां वःगु हे इलय् नेवाः फिल्मया मेम्ह हिरोइन रुबिना महर्जनया नं इहिपा जुइगु खबर पिहां वल । आशिष्माया इहिपा भ्वय् जूगु हे दिनय् रुबिना महर्जनया नं इहिपा भ्वय् न्यात । रुबिना “थम्हं म्हूगु गाः” फिल्मया हिरोइन खःसा वय्कःया इहिपा सुबिन्द्र महर्जनलिसे जूगु खः । आशिष्मा व रुबिनाया इहिपाया रमझम क्वचाये हे मलाःनिबलय् नेवाः फिल्म ख्यःया मेम्ह छम्ह हिरोइनया नं इहिपाया खँ पिहां वःगु दु । उलि जक मखसे आपाःसिनं आश्चर्य प्वंकूगु दकलय् चर्चित इहिपा ला थ्व जुयाबिउगु दु । थथे आपाःसित अजूचायेका बिउगु इहिपा धइगु सुमिका बज्राचार्यया इहिपा खः । सुमिका बज्राचार्य छगू ईया तसकं लोकंह्वाःम्ह हिरोइन् खः । वयागु “सर्गःमिला” साप हे बय्बय् जूगु नेवाः फिल्म खः । “सर्गःमिला” धुंकाः सुमिकां “मिजं”व “हाकु सुपाँय्” नांया निगू फिल्म नं म्हितूगु दु । थ्व धुंकाः फिल्म ख्यलं तापाना वंम्ह सुमिका बज्राचार्य एअर होस्टेस जूवन धइगु बुखँ पिहां वलसा वं एअर होस्टेसया ज्या यानाच्वंगु एअर लाइन्सय् ज्या यानाच्वंम्ह राजेश महर्जनलिसे वयागु यःत्यः जुयाच्वन धइगु हुइनाभुइना नं पिहां वल ।

राजेश महर्जनया मेगु म्हसीका धइगु वय्कः नं नेवाः फिल्मया हिरो खः । उलि जक मखसे ‘सर्गःमिला’य् राजेश व सुमिका नापं म्हितूगु खः । थ्वहे फिल्मय् म्हितूबलय्निसें उमि दथुइ स्वापू क्वातुया वःगु खः । थथे च्यादँ न्ह्यःहे क्वातुया वःगु स्वापु कथं आः वयाः तिनि बल्ल इहिपाया रुपय् हिउगु खः अर्थात सुमिका बज्राचार्यया इहिपा राजेश महर्जनलिसे जूगु खः ।थुकथं थुगुसी नेवाः फिल्मया छम्ह धुंकाः मेम्ह हिरोइनया इहिपा जुल, अले थ्वहे झ्वलय् आः वयाः मेम्ह छम्ह हिरोइन्या नं इहिपा जुइगु खँया हुइनाभुइना न्यने दयावःगु दु । थथे इहिपाया हुइनाभुइना जुयाच्वंम्ह हिरोइनया नां खः – रेमा महर्जन । रेमा महर्जन धइम्ह नेपालभाषाया छगू साप हे च्वछायेबहगु फिल्मया रुपय् कयातःगु अले अन्तर्राष्ट्रिय फिल्म फेस्टिभलय् तकं अवार्ड त्याकेत ताःलाःगु फिल्म “भिन्तुना”या छम्ह हिरोइन खः । थ्व “भिन्तुना” फिल्मया मेम्ह हिरोइन रेश्मी महर्जन खःसा वय्कः मय्जुया इहिपा छुं ई न्ह्यःहे जुइधुंकल । आः मेम्ह हिरोइन रेमाया नं इहिपा जुइगु खँ चर्चाय् वयाच्वंगु दु । रेमा महर्जन थौंकन्हय् अमेरिकाय् च्वना वयाच्वंगु दुसा मेगु महिनाय् इहिपा यायेत नेपाः वइगु खँ दु ।

थुगुसी नेवाः फिल्मया हिरोइनतय् जक मखसे मेमेपिं कलाकारतय् नं इहिपाया लगन चूलाःगु दु । उकी मध्ये छम्ह एलिना शाक्य नं खः । एलिना शाक्य मय्जु नं अमेरिकाय् च्वना वयाच्वंम्ह खःसा वय्कः मय्जुं इहिपा याःम्ह भाजु नं अमेरिकाय् च्वना वयाच्वंम्ह राजिल प्रधान खः । एलिना इहिपाया निंतिं छुं न्हि न्ह्यः वःगु खःसा थन हे इहिपा यानाः हाकनं अमेरिकाय् वनाछ्वःगु खः ।

कलाकारीता ख्यलय् थुगुसी जूगु मेगु इहिपा धइगु नांजाःम्ह म्येँहालामि दिपा महर्जनया इहिपा खः । वय्कः मय्जुया छुं दिं न्ह्यः तिनि इहिपा जूगु खः । अथे हे तुं नीदँति न्ह्यः थः न्यादँ खुदँ तिनि दुबलय् “तिमिला भाबा तसकं बांलाः” धका म्यँे हाःम्ह श्रृजया शाक्यया नं थुगुसी इहिपा जूगु दु । श्रृजया मय्जु थौंकन्हय् इन्डिजिनस टिभीइ नेवाः ज्याझ्वः न्ह्याका वयाच्वंम्ह संचारकःमि खः । नेवाः फिल्म व कलाकारिता ख्यःया मय्जुपिनिगु इहिपाया चर्चा यायेबलय् दँबदँ न्ह्यःतिनि “जिगु मिखाया न्ह्यःने” व “ब्या याये म्हा” फिल्मया हिरोइन बिनु मानन्धरया नां नं वइ ।

बिनु नांजाःम्ह म्येँहालामि सरस्वति मानन्धरया म्ह्याय् खः । थुकथं नेवाः फिल्म ख्यःया हिरोइनतय्गु धमाधम इहिपा जुयावःगु दुसा गुलिखे हिरोइनत इहिपा यानाः नेवाः फिल्म ख्यलं तापाना वने धुंकूपिं नं दु । अज्याःपिं मध्ये “सत्य धरोधर्म” व “यलेबाथः” थेंज्याःगु फिल्म म्हितूम्ह सिन्थिया सेन ताम्रकार छम्ह नं खः । वय्कः मय्जुं इहिपा लिपा डेनमार्कय् तिपू जीवन हना वयाच्वंगु दुसा “जिपिं बदमाश मखु” फिल्मया छम्ह हिरोइन दिपा शाक्य नं इहिपा यानाः विदेश वंगु खःसा आः विदेशं लिहां वयाः नेपाःया हे पर्यटकीय नगरी पोखराय् थः जहानलिसे जीवन हना वयाच्वंगु दु । नेवाः फिल्मया मेमेपिं हिरोइनत मध्ये “मिजं” फिल्मया हिरोइन सनि अवालेया नं इहिपा जुइ धुंकल धइगु न्यनेदुसा इहिपा लिपा फिल्मं तापाना वने धुंकल । अथे हे तुं “निफ्वः स्वां” व “मतिना” थेंज्याःगु नेवाः फिल्मया नापनापं “बन्धकी” नांयागु खस नेपाली फिल्म म्हिताः बेस्ट डेब्यू हिरोइनया अवार्ड तकं त्याकूम्ह गीता शाही नं इहिपा यानाः विदेशय् च्वंवंगु दुसा “थंम्हं म्हूगु गाः” फिल्मय् नेगेटिभ रोल म्हिताः चर्चाय् वःम्ह मीरा माली नं इहिपा लिपा फिल्म ख्यलं तापाना वंम्ह हिरोइन खः ।

इहिपा याःपिं नेवाः फिल्मया हिरोइनतय् चर्चा यायेबलय् त्वःफिके मजिउगु नां धइगु भिन्तुना जोशीया नां नं खः । न्यादँखुदँति न्ह्यः भिन्तुना मय्जुया इहिपा जुल धइगु खँ पिहां वःगु खः । वय्कः मय्जुं शाक्य थरयाम्ह मिजंलिसे इहिपा यात धइगु खँ पिहां वःगु खःसा उगु इलय् भिन्तुनां नेवाः फिल्म ख्यलं दिपाः कायेगु मती तःगु नं खः । थ्वहे झ्वलय् भिन्तुनां छुं फिल्मया अफर नं स्वीकार मयाःगु खः । उगु इलय् त्वःतूगु नेवाः फिल्मय् “इहिपा” नांया फिल्म छगू नं खः । थथे इहिपा लिपा फिल्म लाइन त्वःतेगु संकेत क्यंम्ह भिन्तुना मय्जु छुं ई लिपा हाकनं फिल्मय् खनेदयेकः वल । थौंकन्हय् खय्त ला फिल्मय् सिबें विदेशय् हे अप्वः नुगः क्वसायेका वयाच्वंम्ह भिन्तुना जोशीया तिपु जीवन गुकथं न्ह्यानाच्वंगु दु धइगु छुं सी मदु तर स्वयेबलय् भिन्तुना मय्जु ‘सिंगल’ हे खनेदु ।