ब्राजिल व जर्मनीयात त्याकेमाःगु कासा

विश्वकपया नकआउट चरणय् वनेगु निंतिं थौं समूह ई पाखें स्वीटजरल्यान्ड, ब्राजिल व सर्बियां धेंधेंबल्लाः यायेत्यंगु दु । थुगु समूहय् लाःगु कोस्टारिका धाःसा निगू कासाय् पराजित जुयाः धेंधेंबल्लाखं पिने लायेधुंकूगु दु ।थौं ब्राजिलं सर्विया लिसे म्हितेत्यंगु दुसा स्वीट्जरल्यान्डं कोस्टारिकालिसे म्हितेत्यंगु दु । ब्राजिल व सर्विया निगुलिं कोस्टारिकायात बुका वःगु टिम खः ।

थ्व समूहय् आः ब्राजिल व स्वीट्जरल्यान्डया ४–४ ल्याः दुसा सर्वियाया ३ ल्याः दु । थ्व ल्याखं स्वंगुलिं टिमयात कासा त्याकेफत धाःसा जक याउँक निगूगु चरणय् दुहां वनीगु जुइ । यदि कासा बराबरी यात धाःसा निगूगु चरणय् दुहां वनेगु निंतिं मेगु कासाया लिच्वः स्वयेमालीगु जुइ ।समूह एफय् जर्मनी, मेक्सिको व स्वीडेन स्वंगुलिं देय् निगूगु चरणय् वनेगु लँय् दु ।

थ्व समूहय् मेक्सिको ६ अंक कयाः शीर्षस्थानय् दु । मेक्सिकोयात थौंया कासा बराबरी याःसां याउँक निगूगु चरणय् दुहां वनीगु जुइ । तर स्वीडेनपाखें पराजित जुल धाःसा जर्मनी व द. कोरियाया कासाया लिच्वः पिइमालेफु । जर्मनीं दक्षिण कोरियायात बुकल व स्वीडेनं मेक्सिकोयात बुकल धाःसा स्वंगुलिं टिमया ६–६ अंकं जुइ । थुबलय् गोल अन्तरया ल्याखं नकआउट चरणय् वनीगु टिमयात ल्यइगु जुइ ।