अध्यादेशया पक्षय् पहिचानवादी

येँ (नेपालभाषा टाइम्स)-थारु अभियन्ता रेशम चौधरीयात त्वःतकेगु लागिं सरकारं हःगु अध्यादेशयात तःधंगु दलतय्सं विरोध याःसां पहिचानवादी चीधंगु दलतय्सं धाःसा समर्थन याःगु दु । म्हिगः थीथी पहिचानवादी दलतय्सं छगू पत्रकार सम्मेलन यासें सरकारं हःगु अध्यादेशया समर्थन याःगु खः ।

पत्रकार सम्मेलनय् न्ववासें बहुजन शक्ति पार्टीया अध्यक्ष लिसें पुलांम्ह मन्त्री विश्वेन्द्र पासवानं टीकापुर घटना छगू राजनीतिक घटना जूगु कारणं उकियात अपराधीकरण याये दइ मखु धयादिल । राजनीतिया मूलधारय् वये चाहे जूपिंत वयेगु लुखा चायेका बीगु लागिं नं अध्यादेश आवश्यक जूगु कारणं सरकारया थ्व पलाःयात लसकुस यायेमाःगु खँ वय्कलं कनादिल ।

अथे हे नेपाः राष्ट्रिय पार्टीया अध्यक्ष डा. विजय सैंजुं टीकापुर घटनाय् रेशम चौधरीया छुं ल्हाः मदुगु दावी यानादिल । वय्कलं धयादिल, ‘टीकापुर घटना लिपा अनया स्थानीय थारुतय्त प्रशासनं याःगु ज्यादतिया कारवाही ग्व ? उगु ज्यादति बारे छगू आयोग हे गठन यानाः रिपोर्ट तयार याःगु दु । व रिपोर्ट छाय् सार्वजनिक मयाःगु ?’

अथे हे खम्बुवान राष्ट्रिय मोर्चाया अध्यक्ष आर.के. खम्बुं सरकारं हःगु अध्यादेशया विरोध याःपिं फुक्क पहिचान विरोधीत खः । थनं हे पहिचान समर्थक व विरोधीया कित्ताकाट जुइ ।’

थ्वहे झ्वलय् थारु कल्याणकारिणी सभा व थरुहट संयुक्त संघर्ष समितिं म्हिगः येँया फिब्व ख्यलय् प्रदर्शन यासें सरकारं हःगु अध्यादेश प्रमाणीकरण यायेत राष्ट्रपतियात इनाप यात । आः राष्ट्रपति भण्डारीयाथाय् थ्यनाच्वंगु थ्व अध्यादेश पारित मयायेत नं राष्ट्रपतियात दबाब वनाच्वंगु दु ।