वैशाख ३० गते स्थानीय चुनाव
येँ – सरकारं २०७९ सालया वैशाख ३० गते स्थानीय तहया निर्वाचन यायेगु घोषणा याःगु दु । साेमवाः च्वंगु मन्त्रिपरिषदया बैठकं वइगु वैशाख ३० गते स्थानीय तहया निर्वाचन यायेगु निर्णय याःगु खः।
थ्व स्वयां न्ह्यः निर्वाचन आयोगं जेठ ४ गते स्थानीय तहया निर्वाचन यायेगु प्रस्ताव सरकारयात छ्वःगु खःसा सरकारं वैशाख ३० गते छगू हे चरणय् मतदान यायेगु निर्णय याःगु खः । सरकारं वैशाख ३० वा जेठ ४ गते निर्वाचन यायेगु नितिं कानुन हिलेमाः वा म्वाः धकाः निर्वाचन आयोगयात जानकारी फ्वंगु खःसा आयोगं कानुन परिमार्जन यायेमाःगु अवस्था मदु धकाः सरकारयात सुझाव बीवं वैशाख ३० गते निर्वाचन यायेगु निर्णय सरकारं याःगु खँ सञ्चारमन्त्री ज्ञानेन्द्रबहादुर कार्कीं कनादिल ।
साेमवाः मन्त्रिपरिषद्या बैठक च्वने न्ह्यः सरकारं निर्वाचन आयोगया पदाधिकारीपिं लिसे सहलह याःगु खः । आयोगया पदाधिकारीपिंसं वैशाख ३० गते नं निर्वाचनया नितिं पाय्छिगु ई जूगु सुझाव बिउगु खः ।
थ्वहे वइगु जेठ ५ गते स्थानीय तहया जनप्रतिनिधिपिनि म्याद फुइगु जूगुलिं व स्वयां न्ह्यः हे न्हूपिं जनप्रतिनिधि बहाली यायेफइ कथं ३० गते चुनाव घोषणा जूगु खँ निर्वाचन आयोगं धाःगु दु । इलय् हे चुनाव याकेमाः धया वयाच्वंगु प्रमुख प्रतिपक्षी नेकपा एमालें नं
वैशाख ३० गते निर्वाचनया मिति घोषणा जूगु लसकुस याये बहःजू धकाः टिप्पणी याःगु दु ।
निर्वाचन आयोग सक्रिय
सरकारं वैशाख ३० गते निर्वाचन यायेगु घोषणा यायेवं निर्वाचन आयोग सक्रिय जूगु दु । निर्वाचन आयोगं स्थानीय तह निर्वाचनयात माःगु भवन, परिवहन साधन, फर्निचर लिसें मेमेगु भौतिक साधनया अवस्था व व्यवस्थापनया प्रक्रिया न्ह्याकूगु दु । आयोगं संघीय मामिला तथा सामान्य प्रशासन मन्त्रालयपाखें माःगु भवन, सवारी साधन व फर्निचरसहित स्थानीय तहयाके विवरण माग याःगु खः ।
संविधानया धारा २४७ स निर्वाचन आयोगयात निर्वाचन प्रयोजनया नितिं माःगु कर्मचारी व मेगु ग्वाहालि नेपाल सरकार, प्रदेश सरकार व स्थानीय सरकारं उपलब्ध याकेमाः धकाः व्यवस्था यानातःकथं आयोगं मन्त्रालयलिसे पत्राचार याःगु खः ।
आयोगं मन्त्रालययात छ्वःगु पती स्थानीय तह लिसें जिल्ला समन्वय समितिया निर्वाचन यायेगु नितिं म्होतिं नं निलाया नितिं निर्वाचन अधिकृतया ज्याकू स्थापना व सञ्चालन यायेत ७५३ गुलिं स्थानीय तहया विवरण तयार यानाः माघ मसान्त दुने अनिवार्य रुपं छ्वया हयेत इनाप यानातःगु दु ।
साेमवाः आयोगया प्रवक्ता शालिग्राम पौडेलं छगू विज्ञप्ति पिकासें मुख्य निर्वाचन अधिकृत, निर्वाचन अधिकृतया ज्याकू स्थापना जुइधुंकाः ज्याकू सञ्चालनया नितिं सम्बन्धित स्थानीय तहपाखें म्होति नं छगः छगः डेस्कटप कम्प्युटर, ल्यापटप, स्क्यानर व प्रिन्टर उपलब्ध जुइकथं व्यवस्थापन यायेत नं फुक्क स्थानीय तहयात पत्राचार यायेत इनाप याःगु दु ।
LEAVE YOUR COMMENTS