थौं जक १८९म्हेसित कोरोना, यलय् हानं छम्हेसित संक्रमण

येँ – नेपालय् नीप्यघौया दुने थप १८९म्हेसित कोरोनाया संक्रमण जूगु दु । स्वास्थ्य तथा जनसंख्या मन्त्रालयया कथं ४म्ह मिसा सहित १८९म्हेसित संक्रमणया पुष्टि जूगु खः ।

संक्रमितत मध्ये छम्ह यलया २३दँया मिसा खः । येँया राष्ट्रिय जनस्वास्थ्य प्रयोगशालाय् जूगु परीक्षणय् उम्ह मिसयात संक्रमणया पुष्टि जूगु खः । अथेहे जनस्वास्थ्य प्रयोगशालाय् याःगु परीक्षणय् कपिलवस्तुया ७७म्ह, धनुषया ७म्ह, झापाया १म्ह, महोत्तरीया ४म्ह व रौतहटया ६म्ह, सर्लाहीया १७म्ह व सिरहाया ११म्ह नापं १ सय २४म्हेसित संक्रमण खनेदुगु खः ।

अथेहे देय्या थीथी थासय् याःगु परीक्षणय् कपिलवस्तुया ३२म्ह, सप्तरीया ९म्ह, दाङया १३म्ह, बाराया १म्ह, पर्साया २म्ह, दैलेखया १४म्ह, संखुवासभाया २म्हेसित संक्रमणया पुष्टि जूगु दु । थ्व नापं संक्रमिततय् ल्याः १ हजार ४ सय १म्ह थ्यंगु दु ।