शताब्दीपुरुष जोशीयात चिनिया राजदूतं नाप लात
यल – नकतिनि जक जन्म शताब्दी हनादीम्ह वाङ्मय शताब्दी पुरुष सत्यमोहन जोशीयात नेपाःया निंतिं चिनिया राजदूत होउ यान्छीं नाप लानादीगु दु । जोशीया निजी निवास बखुंबहालय् वनाः चिनिया राजदूत यान्छीं भेटवार्ता यानादीगु खः ।
भेटया इलय् शताब्दीपुरुष जोशीं चिनिया साहित्ययात कयाः थम्हं यानागु अध्ययन, अनुसन्धान लगायतया अरनिकोया नेपाः व चीन दथुया सम्बन्ध व अरनिकोया बारे थम्हं च्वयागु सफूया बारे राजदूत यान्छीयात जानकारी बियादीगु खः ।शताब्दीपुरुष जोशीं च्वयादीगु ‘श्वेत चैत्य’ सफू चिनिया दूतावासं चिनिया भासं अनुवाद यानाः पिथनेगु तयारी जुयाच्वंगु राजदूत यान्छी कनादीगु दु ।
दूतावासं नेपाल भ्रमण वर्ष–२०२० यात ध्यानय् तयाः जोशीं च्वयादीगु उगु सफू अनुवाद यानाः पिथनेगु तयारी याःगु खः ।यल महानगरपालिकाया प्रमुख चिरिबाबु महर्जनं जोशी च्वयादीगु श्वेत चैत्य सफू दूतावासं चिनिया भासं अनुवाद याना पिथनेत्यंगु धासें लसता प्वंकादिल । वय्कलं जोशी उगु सफुतिं नेपालय् अप्वः स्वयां अप्वः चिनिया पर्यटक दुकायेत ग्वाहालि जुइगु नं विश्वास प्वंकादिल ।
चिनिया राजदूत यान्छीं उगु इलय् १०० दँ बुदिं हनादीम्ह जोशीया सुस्वास्थ्य व दीर्घ जीवनया कामना यानादीगु यल महानगरपालिकाया प्रवक्ता राजु महर्जनं जानकारी बियादिल ।राजदूत यान्छीं जोशीयात चीन भ्रमणया निंतिं प्रस्ताव यानादीगु व जोशीं थःगु स्वास्थ्य व उमेरया कारणं भ्रमणया निंतिं असमर्थता क्यनादीगु प्रवक्ता महर्जनं कनादिल ।
LEAVE YOUR COMMENTS