छायाँदेवी पत्रकार सम्मेलनय् हे विरोध

येँ – येँया थँबहिली दयेकूगु छायाँदेवी कम्प्लेक्सपाखें म्हिगः याःगु पत्रकार सम्मेलनय् हे दुहां वनाः स्थानीय जनतां विरोध याःगु दु । अन च्वंगु पलेस्वां पुखू म्हासे यानाः कम्प्लेक्स दयेकूगु धासें पत्रकार सम्मेलनय् हे विरोध प्वंकूगु खः । पत्रकार सम्मेलनय् न्ववासें छायाँदेवी सेन्टरया प्रबन्ध निर्देशक महेश्वर श्रेष्ठं खुदँ न्ह्यवंनिसें थःपिंसं सेन्टर दयेकाच्वनागु धासें अबलय् स्थानीय वासिन्दा छु स्वयाच्वन व आः सेन्टर दयेके क्वचायेधुंकाः छाय् द्वपं बिउ वयाच्वन धकाः न्ह्यसः तयादीगु खः ।

तर स्थानीय वासिन्दां धाःसा अदालतय् मुद्दा जुयाच्वंसां नं भूमाफियातय्सं चांचां निर्माण ज्या यानाच्वंगु द्वपं बिउगु खः । पत्रकार सम्मेलनय् सेन्टरया सुमन पाण्डें थःपिंसं जग्गा न्यानाबलय् कानुनी प्रक्रिया कथं हे न्यानागु खँ कनादीगु खः । तर स्थानीय जनतां धाःसा उगु जग्गा सार्वजनिक पुखू खः धासें उकियात सार्वजनिक पुखू हे कायम यायेमाःगु माग याना वयाच्वंगु दु । सेन्टरया जग्गा विवाद सर्वोच्च अदालतय् नं विचाराधीन जुयाच्वंगु दु ।