ने. सं. ११४४ कौलाथ्व पञ्चमी -

भारतं छाय् क्वपाल नेपाःया अनुदान ?

येँ – भारतया वित्तमन्त्री निर्मला सीतारमणं थुगुसी सार्वजनिक याःगु बजेटय् नेपाःयात बीगु याना वयाच्वंगु आर्थिक अनुदानया रकम यक्वं क्वपाःगु दु । भारतं नेपाःयात बीगु अनुदान छाय् क्वपाःगु धइगु खँयात कयाः भारत व नेपाःया राजनीतिक ख्यलय् थीथी चर्चा नं शुरु जूगु दु ।

नेपाःयात भारतं थगुने १२ अर्ब तका आर्थिक अनुदान बिउगु खःसा थुगुसी थ्व दां क्वपालाः ८ अर्ब जक याःगु दु । नेपाःया अर्थविद्तय्सं धाःसा भारतं थ्व अनुदान क्वपाःसां नेपाःयात खास लिच्वः लाइगु खने मदु धाःसां थुकिं नेपाः–भारत राजनीतिक स्वापूयात धाःसा लिच्वः लाकीगु खतरा खंकूगु दु ।

भारतं नेपाःयात बीगु आर्थिक अनुदान क्वपाःगुया कारण नेपालय् अप्वयाच्वंगु चिनियाँ प्रभाव जुइमाः धकाः नं अनुमान याःगु दु । थौंकन्हय् नेपालय् चिनियाँ गतिविधि यक्व अप्वया वंगु खँय् असन्तुष्ट जुयाच्वंगु भारतं उकिया हे संकेत कथं अनुदान दां क्वपाःगु अनुमान याःगु दु ।

भारतया विपक्षी पार्टीतय्सं धाःसा नेपाःया अनुदान दां क्वपालेगु ज्यां नेपाःयात चीनया खेमाय् दुहां वनेत अझ घ्वासा बीफु धकाः आलोचना याना हःगु दु । नेपालय् चिनियाँ गतिविधि अप्वयाच्वंगु कारणं नेपाःयात थःगु पक्षय् साला हयेमाःथाय् अःखतं थुकिं तंचायेकेगु ज्या जुइगु खँ नं उमिसं धया हःगु दु । भारतं आर्थिक बीगु थीथी देय्त मध्ये नेपाः निगूगु ल्याखय् लानाच्वंगु दुसा आः थ्व कटौती जुयाः स्वंगूगु नम्बरय् लाः वंगु दु । भारतया अनुमान दकलय् अप्वः काइगु देय् भूटान जूगु दुसा निगूगु नम्बरय् मरिसस जूगु दु ।