चीनया कोरोना विरुद्धया न्हापांगु भाइरसयात पेटेंट बिल
एजेन्सी – चिनिया कम्पनी क्यानसाइनो बायलोजिक्स कर्पोरेशनं दयेकूगु कोरोना भाइरसविरुद्धया न्हापांगु भ्याक्सिन एडीफाइभ-एनसिओभीयात पेटेंट बिउगु दु। चिनिया सरकारी अखबार ग्लोबल टाइम्सं थुकिया जानकारी बिउगु खः ।
चीनया बौद्धिक सम्पदा नियमन याःगु संस्थां वंगु ११ अगस्टय् क्यानसाइनोया भ्याक्सिनयात पेटेंट बिइत स्वीकृति बिउगु खः । चीनय् कोभिड १९ या भ्याक्सिनयात स्वीकृति बिउगु थ्व न्हापांगु खः । तर थ्व भ्याक्सिनयात पेटेंट बिउगु धयागु वैज्ञानिक उपब्लिध स्वयां व्यावसायिक उपलब्धि कथं अन्तर्राष्ट्रिय ख्यलं कयाच्वंगु दु ।
वाल्टर एण्ड एलिजा हल इन्ष्टिच्यूट अफ मेडिकल रिसर्चया प्रोफेसर मार्क पेलेग्रिनीं ‘द गार्डियन’ लिसे खँ ल्हासें धयादीगु दु, ‘पेटेंट बिउगु कारणं आः थ्व भ्याक्सिनया नक्कल सुनानं यायेफइमखु, तर क्लिनिकल ट्रायलया निंतिं पेटेंट हे बीमाः धयागु अनिवार्य मापदण्ड मदु ।’
तर थ्व पेटेंटया कारणं अक्सफोर्ड विश्वविद्यालयं दयेकाच्वंगु भ्याक्सिन उत्पादनय् समस्या वइगु खः ला धयागु चर्चा नं जूगु दु। पेलिग्रिनीया कथं चीनं दयेकूगु भ्याक्सिन बारे छु. वाः न्ह्यः मेडिकल जर्नल लैन्सेटय् खबर पिहां वःगु खः । अक्साफोर्डया पुचलं नं उबलय् पाखे हे थःपिनिगु भ्याक्सिनया बारे जानकारी पिथँगु खः । थ्व जानकारी कथं निगुलिं भ्याक्सिनय् कोरोना भाइरस विरुद्ध प्रतिरोधी क्षमता अप्वयेकेत एडेनोभाइरस (सेखं व सामान्य संक्रमण हयाबीगु भाइरस) छ्यलातःगु दु ।
साउदी अरबं चिनिया कम्पनी क्यानसाइनों दयेकूगु भ्याक्सिनया स्वंगूगु चरणया परीक्षण थःथाय् यायेगु खँ धाये धुंकूगु दु। मेखे कम्पनीं थ्व भाइरसया स्वंगूगु चरणया परीक्षण यायेगु निंतिं रुस, ब्राजिल व चिलीलिसे नं खँ ल्हानाच्वंगु दु। भ्याक्सिनयात पेटेंट बिउगु खबर वयेवं सोमवाः हे हंगकंगया शेयर बजारय् क्यानसाइनो कम्पनीया शेयरया भाः १४ प्रतिशत थहां वंगु दुसा संघाईया शेयर बजारय् ६.६ प्रतिशतं भाः थहां वंगु दु ।
LEAVE YOUR COMMENTS