येँ महानगरय् आः स्मार्ट पार्किङ

येँ महानगरपालिकां देय्या राजधानी जुयाच्वंगु येँया ट्राफिक व्यवस्थापनया निंतिं ‘स्मार्ट पार्किङ’ शुरु याःगु दु । सवारी साधनया अत्याधिक चापया कारणं स्वनिगलय् ट्राफिकया चाप नं अप्वःगु नापं सहर हे अस्तव्यस्त जुइवं उकियात व्यवस्थापन यायेगु ल्याखं येँ महानगरपालिकां ‘स्मार्ट पार्किङ’ योजना न्ह्याकूगु खः ।

येँ मनपां वंगु विहीवाःनिसें उगु योजना न्ह्याकूगु खः ।वि.सं.या न्हूदँया शुरुवातलिसें नगरवासीयात सवारी साधनया पार्किङ व्यवस्थापनया समस्यापाखें मुक्ति बीगु धाःगु खःसां नं आन्तरिक सहलहया कारणं लछि लिपा जक उगु योजना (सेवा) शुरु याःगु खः ।

येँ महानगरपालिकां स्वनिगः दुने नं दकलय् अप्वः सवारी चाप अप्वइगु थाय् न्हू सतक व उकिया जःखःया न्यागू थासय् ‘स्मार्ट पार्किङ’ व्यवस्थापन शुरु याःगु खःसा थुकिया लिसें आः पार्किङ समस्या म्हो जुइगु विश्वास येँ मनपां याःगु दु । सवारी साधनया अत्याधिक मात्राया चाप व्यवस्थापन जुइमफुगुलिं थनया जीवन पद्दति व सहरी सुविधा उपलब्धताय् तकं समस्या जुइवं महानगरं स्मार्ट पार्किङ योजना न्ह्यः हःगु येँ मनपाया प्रवक्ता ईश्वरमान डंगोलं कनादिल ।

येँ मनपां न्हापांगु चरणय् परीक्षणया रुपय् पार्किङ स्थल निर्धारण यानाः स्मार्ट पार्किङ सेवा शुरु याःगु खः । न्हापांगु चरणय् दरवारमार्ग, विशाल बजाः, वंघः, प्यूखा व खिचापुखुलिइ थ्व सेवा शुरु याःगु खः । थुकिया प्रभावकारीताया लिधंसाय् मेमेगु थासय् नं आवश्यकता स्वयाः स्मार्ट पार्किङ सेवा संचालन यायेगु तयारी येँ मनपाया दु ।

प्रभावकारी व आवश्यकता स्वयाः मेमेगु थासय् नं सवारी साधन तयेगु निंतिं व्यवस्थापनया ज्या यायेगु योजना येँ मनपाया दुसा येँ मनपां येँ देय्या चरित्र, सरल, उपयुक्त, दिगो व प्रयोगकर्तातय् आवश्यकता पूवंकेत पार्किङ व्यवस्थापनय् महानगरया प्राथमिकता दुगु प्रवक्ता डंगोलया धापू दु । ‘पार्किङयात सहज दयेके फत धाःसां जक नं सहरया यातायात प्रणालीइ तःधंगु सुधार जुइ’, वय्कलं धयादिल ।

स्मार्ट पार्किङय् छक्वःया पालय् करिब ८०० निचाः घःचाः दुगु सवारी साधन व ४० गः प्यचाः घःचाः दुगु सवारी साधन पार्किङ याये फइ । उगु क्षेत्रय् पार्किङ यायेबलय् निचाः घःचाः दुगु सवारी साधनया निंतिं प्रतिघन्टा २० तका लगे जुइ । अथे हे प्यचाः घःचाः दुगु सवारी साधनया निंतिं प्रतिघन्टा ५० तका शुल्क क्वःछिनातःगु दु ।

न्हापांखुसी संचालनय् हयेत्यंगु स्मार्ट पार्किङ मेमेगु पार्किङया तुलनाय् तसकं फरक जुइ । अज्याःगु क्षेत्रय् वने न्ह्यः सवारी चालकं थःगु मोबाइलं हे ई व थाय् सुनिश्चित याये फइ । सेन्सरय् आधारित थुगु प्रणालीइ आवश्यकता स्वयाः प्रत्येक सवारी दुहां वःगु व पिहां वंगु तथ्यांक दइ ।

प्रयोगकर्तां मोबाइलपाखें ‘केटीएम पार्क’ एप्लिकेशन डाउनलोड यानाः थःगु छेँय् हे च्वनाः सवारी साधन पार्किङया निंतिं थाय् बुकिङ याये फइ । वय्कःयाकथं थःगु सवारी साधन पार्किङ यायेमाःम्ह मनुखं एप्लिकेशनपाखें छेँय् हे च्वनाः पार्किङया बारे सूचना काये फइगु व १५ गू मिनेट न्ह्यः हे पार्किङ बुकिङ याये खनी ।

येँ मनपां ‘ह्विल्स ट्रली योर्स’ प्रा.लि व ‘एड गुरु’ लिसेया सहकार्यय् थ्व सेवा संचालनय् हःगु खः । न्यागू थासय् स्मार्ट पार्किङ संचालनय् हयेत छगू करोडया लागत लगे जूगु येँ मनपां न्ह्यथंगु दु ।

सम्बन्धित बुखँ

LEAVE YOUR COMMENTS