मेलम्चीया विदेशी कर्मचारी ज्वन
परियोजना दथुइ हे त्वःताः बिसिउँ वनेत्यंगु आशंका
येँ – क्रिसमस न्यायेकेगु त्वहः चिनाः कार्यक्षेत्र त्वःताः येँय् वयाच्वंपिं मेलम्ची खानेपानी आयोजनाया च्याम्ह विदेशी कर्मचारीतय्त म्हीग प्रहरीं ज्वंगु दु । आयोजना दयेकेगु ठेक्का कयातःपिं इटालियन कम्पनी सिएमसीया कर्मचारीत बिसिउँ वनेत्यंगु धासें प्रहरीं उमित नियन्त्रणय् काःगु खः ।
महानगरी प्रहरी वृत्त दरवारमार्गया पुचलं उमित आइतवाः बहनी थँबहीया छगू रेष्टुरेन्टं ज्वनाः खानेपानी मन्त्रालयया जिम्माय् बिउगु खः ।
प्रहरीया कथं ठेकेदार कम्पनीया कर्मचारीत बिसिउँ वनेत्यंगु धासें उमित ज्वनेगु लागिं मन्त्रालयं हे प्रहरीयात खबर याःगु खः । ज्वंपिं मध्ये प्रोजेक्ट म्यानेजर क्रिश्चियानो ग्रेचो लिसें मेपिं कर्मचारीत लाःगु दु ।
थ्व स्वयां न्ह्यः नं छम्ह कर्मचारीयात त्रिभुवन अन्तर्राष्ट्रिय विमानस्थलया अध्यागमन विभागं ज्वंगु खः । अनुसन्धानया झ्वलय् वहे कर्मचारीं मेपिं कर्मचारीत नं बिसिउँ वनेत्यंगु सुचं बिउगु खः । उमिसं पासपोर्ट तयार यायेगु लिसें टिकट तकं कायेधुंकूगु दु । गैर जिम्मेवारी तरिकां ज्या त्वःताः बिसिउँ वनेत्यंगुलिं प्रहरीया ग्वाहालि कयाः उमित ज्वनागु खँ मन्त्रालयया छम्ह अधिकारीं धाःगु दु ।
मन्त्रालयं उमिगु पासपोर्ट नं जफत याःगु दु । कम्पनीया स्थिति स्यना वनाच्वंगुलिं थःपिं बिसिउँ वनेत्यनागु खँ ज्वंपिं कर्मचारीतय्सं स्वीकार याःगु दावी प्रहरीं याःगु दु । थ्व स्वयां छुं न्हिं न्ह्यः जक इटालीया कम्पनी आर्थिक अवस्था स्यना वनाच्वंगु रिपोर्ट सार्वजनिक जूगु खः । उगु रिपोर्ट सार्वजनिक जुइवं कम्पनीं थीथी देशय् सञ्चालन यानाच्वंगु आयोजना खतराय् लाःगु दु ।
मेलम्चीया भविष्य अनिश्चित
इटालियन ठेकेदार कम्पनी सीएमसीं नेपालय् दयेकाच्वंगु मेलम्ची खानेपानी आयोजना त्वःतागु घोषणा याःगु दु । थःपिंसं आयोजना त्वःतागु जुल धकाः उमिसं सरकारयात जानकारीया पौ नं बिउगु खः तर सरकारं धाःसा उमिसं बिउगु पत्र बुझे यानाः कायेत अस्वीकार याःगु दु ।
ठेकेदार कम्पनीया प्रतिनिधि आयोजनाया ल्यं दुगु ज्या याये मफइगु व्यहोरा दुगु पौ ज्वनाः आइतवाः मेलम्ची खानेपानी आयोजनाय् वंगु खः । तर आयोजनाया अधिकारीतय्सं पौ बुझे यायेत अस्वीकार यानाः लित छ्वया बिल । खानेपानी मन्त्रालयं पौ बुझे यानाः मकायेत आयोजनायात निर्देशन बिउगु खः ।
सीएमसीं ‘फन्ड सर्टेज’ जूगु धासें ज्या न्ह्यःने न्ह्याके मफइगु खँ धाःगु खः । तर पौ बुझे यानाः मकाःसां नं आः वयाः उकिया कर्मचारीतय्त हे ज्वने माःगु अवस्था पिहां वःगुलिं नेपालय् तसकं आशा यानाः स्वयाच्वंगु मेलम्ची परियोजनाया भविष्य धाःसा अनिश्चित जूवंगु दु ।
LEAVE YOUR COMMENTS