ने. सं. ११४३ तछलाथ्व दशमी -

न्हूगु शहरया प्रस्ताव क्याबिनेटय्

येँ (नेपालभाषा टाइम्स)-स्थानीय जनताया चरम विरोध दयाच्वंगु खःसां नं राजधानी येँ दुने स्वंगू शहर दयेकेगु प्रस्तावबारे मन्त्रिपरिषद बैठकय् सहलह जूगु खँ सीदुगु दु । आः दयेकेगु धकाः प्रस्तावित जुयाच्वंगु स्वंगू मध्ये उत्तरी लागाया सक्व नगरपालिका, कागेश्वरी मनोहरा नगरपालिका व गोकर्णेश्वर नगरपालिकाया १६ हजार रोपनी जग्गा एकीकरण यानाः न्हूगु शहर दयेकेगु प्रस्ताव आः मन्त्रिपरिषद्य् यंकूगु खँ सीदुगु दु ।

थ्व लागाय् न्हूगु शहर दयेकेगु धकाः उपत्यका विकास प्राधिकरणं ताः ई न्ह्यवंनिसें हे अन जग्गा अधिकरण यासें न्याये मीगु रोक्का यानातःगु दु । तर थ्व स्वंगुलिं नगरपालिकाया स्थानीय जनतां यदि थन न्हूगु शहर दयेकेल धकाःसा थनया कृषियोग्य जग्गा फुक्क नष्ट जुइ धासें शहर दयेकेगु ज्याया विरोध याना वयाच्वंगु दु ।

थन न्हूगु शहर दयेकेवं स्थानीय जनताया ४५ प्रतिशत जग्गा वनीगु खने दयाच्वंगु दु । जानकार सूत्रतय्सं धाः कथं थ्व थासय् जग्गा न्याये मी बन्द याना तःसां जग्गा दलालतय्सं थनया कारोवारया लागिं माःगु तयारी ज्या न्ह्याकाच्वनेधुंकूगु दुसा आपालं सरकारी कर्मचारीतय्सं अन जग्गा ल्हातय् लाकेगु रणनीति दयेकाच्वंगु दु । थज्याःगु थीथी कारणं यानाः स्थानीय जनतां थ्व परियोजना पारदर्शी मजू धासें उकिया विरोध याना वयाच्वंगु दु ।

अथे हे स्वनिगःया स्थानीय अभि–यन्तातय्सं थन न्हूगु शहर दयेकेल धाःसा स्वनिगलय् अझ हे पिनेयापिं मनूत बढे जुयाः जनसंख्या अप्वइगु व थुकिं यानाः स्वनिगःया सांस्कृतिक, पर्यावरण, फोहोर, भौतिक पूर्वाधार थेंज्याःगु समस्या अझ अप्वइ धकाः उकिया विरोध यानाच्वंगु दु । स्थानीय जनताया विरोध जुइक जुइक नं थ्व परियोजना मन्त्रिपरिषद्य् यंकूगुलिं आः सरकार समक्ष हे विरोध याये मालीगु खँ धयाहःगु दु ।