इतुंबहालं खुया यंकूगु सम्पदा लित हल

येँ(नेपालभाषा टाइम्स)- थनया इतुंबहालं खुया यंकूगु सम्पदा हाकनं इतुंबहालय् लित हःगु दु । तःदँ न्ह्यः इतुंबहालं खुया यंकूगु ऐतिहासिक महत्वया ‘शारदुल’ व ‘सालभज्जिका’ हाकनं इतुंबहालय् तुं लित हःगु खः ।

इतुंबहालं खुया यंकूगु उगु सम्पदा विदेशय् थ्यनेधुंकूगु खः । लिपा उकियात लित हयाः छाउनीइ च्वंगु संग्रहालयय् तयातःगु खःसा आः अनं इतुंबहालय् तुं लित हःगु दु । वंगु चैत २ गते श्री केशचन्द्र महाविहार संरक्षण समितिया नायः प्रज्ञारत्न शाक्यया नेतृत्वयय् पदाधिकारी सहितया पुचः उगु सम्पदा लित कायेत वंगु खः । संग्रहालयया निर्देशक जयराम श्रेष्ठं आवश्यक कानूनी प्रक्रिया पूवंकाः उगु सम्पदा लित बिया हःगु खः ।

उगु इलय् संग्रहालयया निर्देशक श्रेष्ठ, नागरिक न्ह्यलुवा कनकमणि दीक्षित, समितिया नायः शाक्य लगायतं बहाः बहीया थुकथंया सम्पदाया महत्व व थुकिया संरक्षणया निंतिं म्हितेमाःगु भूमिकाया बारे थःथःगु नुगःखँ तयादीगु खः ।

समितिया नायः शाक्यं बियादीगु जानकारीकथं सन् १९९९ पाखे इतुंबहालं खुया यंकूगु ‘शारदुल’ रुविन आर्ट अफ म्युजियम व ‘सालभज्जिका’ मेट्रोपोलिटान म्युजियम अमेरिकाय्’ तयातःगु खः । निगुलिं काष्ठकाल आवश्यक कानूनी प्रक्रिया पूवंकाः लित हयाः छाउनीया संग्रहालयय् तयातःगु खः ।