स्वयम्भूराज शाक्यया एकल सांगीतिक सनिल जुइगु
यल – वरिष्ठ संगीतकःमि स्वयम्भूराज शाक्यया एकल सांगीतिक सनिल वइगु शनिवाः जुइगु जूगु दु । ‘जुजु वेयर्स ओ प्रिय लिफः स्वयाः’या नामं उगु सांगीतिक सनिल जुइत्यंगु खः । मंगल इन्टरटेनमेन्टया ग्वसालय् जुइगु उगु ज्याझ्वः वरिष्ठ संगीतकःमि शाक्य जन्म जूगु हःखा त्वाः कोतय् जुइ ।
निघौ तक न्ह्याइगु ज्याझ्वलय् शाक्ययात म्येँ हालामिपिं संगीता शाक्य, नीशा देसार, सुमन कपाली, अनु शाक्य, प्रियंका शाक्य व चन्द्रमान शाक्यं साथ बियादी । ज्याझ्वलय् लोकंह्वाःम्ह संगीतकार भूपेन्द्र वज्राचार्यया संगीत संयोजनय् ८ म्ह वाद्यवादक बाजं थाना ग्वाहालि याइगु जूगु दु ।
ज्याझ्वलय् आः थें म्येँ रेकर्डिङया सुविधा सहज मजूबलय् रेकर्ड जूगु म्येँ भाजु शाक्यया लोकंह्वाःगु म्येँ ‘ओ प्रिय लिफः स्वयाः’या नामं जुइत्यंगु खः । उगु म्येँय् स्वयम्भूराज शाक्यनापं सपना श्रीं सः बियादीगु खःसा बिरेन शाक्य व शान्त शाक्य च्वयादीगु अले बिरेन शाक्यं लसय् हनादीगु खः ।
ज्याझ्वलय् मविवि शाह, दिनेश अधिकारी, वंशीधर वज्राचार्य, प्रकाश साय्मि, शाक्य सुरेन, चन्द्रमान शाक्य, तीर्थ माली, शान्त शाक्य, हेमन्त विवशया रचनाय् संगीतकःमि शाक्यनापं नातिकाजी, तीर्थ माली, मनराजा नकःमि, नरेन्द्र प्यासी, चन्द्रमान शाक्य, विरेन शाक्य, चन्द्रराज शर्मां लसय् हनादीगु म्येँ न्ह्यब्वइ ।
ज्याझ्वःया मू प्रायोजक जुजु वेयर्स खःसा सह–प्रायोजक सम्झना लेब्ररेटोरी क्लिनिक प्रा.लि., हौगः, यल व होटल सारा श्री प्रा.लि, लुम्बिनी खः । २४ क्यारेट, मानभवन, जावलाखेल, यलं नं ज्याझ्वःयात ग्वाहालि याइगु जूगु दु । रेडियो नेपालया विशिष्ट श्रेणीया म्येँ हालामि शाक्य थीथी सिरपाः व सम्मानं सम्मानित जुयादीगु दुसा वय्कलं तिब्बत, श्रीलंका, बंगलादेश, साउदी अरेबिया, जापान, हङकङ, बैंङ्ककय् नेपाःया सांगीतिक पहिचान न्ह्यब्वयादीधुंकूगु दु ।
न्याचाः याकः म्येँचाःनापं २५० पु सिबें अप्वः म्येँ हालादीधुंकूम्ह वरिष्ठ संगीतकःमि शाक्यया स्वंगू एकल सांगीतिक प्रस्तुतिया ज्याझ्वः नं जुइधुंकूगु दु । उगु स्वंगुलिं ज्याझ्वः टिकट शो खःसा थुगु ज्याझ्वः सकसिया नितिं प्रवेश निःशुल्क खः ।
LEAVE YOUR COMMENTS