परियत्ति ब्वँमिपिनि दथुइ वक्तृत्व धेंधेंबल्लाः

ख्वप- मैत्रेय युवा संघया परियत्ति ब्वँमिपिनिगु दथुइ आन्तरिक वक्तृत्व धेंधेंबल्लाः जुल । अखिल नेपाल भिक्षु महासंघपाखें न्ह्यानाच्वंगु नेपाल बौद्ध परियत्ति शिक्षा ब्वँमि विद्यार्थी पिनिगु व्यक्तित्व सुथां लाकेगु तातुनाः संघपाखें उकथं वक्तृत्वकला कासा याःगु खः ।

मैत्रेय परियत्ति केन्द्रया केन्द्राध्यक्ष तीर्थराज वज्राचार्यया सभापतित्वय् पंचशील ग्रहण यासें न्ह्याःगु ज्याझ्वलय् मूपाहांकथं भिक्षु अर्जुन बिज्याःगु खः । संचित बुद्धाचार्यं लसकुस यानादीगु ज्याझ्वलय् मुनि विहार व परियत्ति केन्द्रया झिंछम्ह परियत्ति ब्वँमिपिंसं ब्वति काःगु खः ।

वक्तृत्वकला कासाय् ‘असेनवाच बालानं’ विषयय् प्रज्वल धुख्वा न्हाप, ‘सप्तसत्पुरुष धन’ विषयय् जेनिशा श्रेष्ठ लिउ व ‘सब्बेसत्ता कम्मसका’ विषयय् रञ्जु तामाङ लियांलिउ लाःगु खः । थनया थथुबहिलिइ च्वंगु जयकीर्ति विहारय् जूगु वक्तृत्वकला कासाय् उत्कृष्ट जूपिंत मूपाहां भिक्षु अर्जुनं दसिपौ व सिरपाः नापं दाता न्हुछेकुमार लासिवा व रत्नायन परिवारपाखें दानशोभा शाक्यं दां सिरपाः लःल्हानादीगु खः ।
भिक्षु अर्जुनं धर्मोपदेश बियाबिज्यासें परियत्ति ब्वँमिपिं सकसिनं थःथःगु छेँय् मांअबुयात ग्वाहालि यायेमाःगु व सेवा यायेमाः धयाबिज्यासें मांअबुं नं थः सन्तानप्रति कर्तव्य पूवंकेमाः धयाबिज्यात ।

ज्याझ्वलय् परियत्ति अक्षय कोषया दाता लासिवां थम्हं बुद्ध शिक्षा बांलाक अध्ययन याये मफुसां थःगु नुगः धाःसा बुद्ध धर्मय् क्वसाःगु खँय् लसता प्वंकादिल