सरोद वादक राजोपाध्याय भारतय् सम्मानित

येँ- वरिष्ठ सरोद वादक सुदर्शन राजोपाध्याय भारतय् राष्ट्रिय रत्न अवार्डपाखें सम्मानित जुयादीगु दु । संगीत क्षेत्रय् ताःई न्ह्यवंनिसें बियादीगु योगदानयात कयाः वय्कःयात उगु सम्मानं सम्मानित याःगु खः । वंगु फेब्रुअरी ८ तारिख कुन्हुया वय्कलं संगीत क्षेत्रय् बियादीगु योगदानयात कयाः भारतया अल इन्डिया रियल फर कल्चरल एजुकेशन सोसाइटी, गान्धी पीस फाउन्डेसन, नेपाल एण्ड युथ वल्र्ड एण्ड सोसियल मञ्च राजस्थानया ग्वसालय् इन्दोरया विजयनगरय् जूगु अन्तर्राष्ट्रिय सम्मेलनय् ‘राष्ट्रिय रत्न अवार्ड एन्ड कन्फेरेशन २०२०’पाखें सम्मान याःगु खः ।

स्वंगू दशक न्ह्यवंनिसें संगीत साधनय् लगे जुयाच्वनादीम्ह वय्कःयात थ्व स्वयां न्ह्यः वंगु माघ ५ गते राजस्थानया हे एनआरबी फाउण्डेसन एवं भब्या इन्टरनेशनलया ग्वसालय् विवेकानन्द इन्ष्टिच्युट अफ टेक्नोलोजीइ जूगु ज्याझ्वलय् ’विविधता मे एकता राष्ट्रिय सम्मान–२०२०’पाखें सम्मान याःगु खःसा थगुने जुलाई १९ कुन्हु ‘इन्टरनेशनल इण्डियन बेस्टिज अवार्ड–२०१९ लःल्हाःगु खः ।

विशेष यानाः सरोद वादनय् नेपालय् हे नांजाःम्ह वय्कःयात सन् २०१३ य् पश्चिम बंगाल सरकारं ‘संगीत मञ्जरी’ उपाधी लःल्हाःगु खःसा २०१५ य् गुजरातय् जूगु सुरिल सा“झपाखें स्वर्णपत्रं नं सम्मानित जुयादीधुंकूगु दु ।

वय्कःया नेपालभाषाय् नसला, हसना, छन्हु निन्हु, छगू मतिना, शास्त्रीय संगीतय् वन डे रागाज, सोलफुल म्युजिक फर मेडिटेशन, खस् भासं पलपल, पानीसरी, त्यो रात व भारतं सुरिल म्युजिक इन २०१५ नांया सीडी व म्येँचाःत पिहां वयेधुंकूगु दु ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन