डब्लुएनओं सत्यमोहन लुमंकल

येँ(नेपालभाषा टाइम्स)- विश्व नेवाः संगठन (डब्लुएनओं) शताब्दी पुरुष सत्यमोहन जोशीया लुमन्तिइ विचाः मुँज्या याःगु दु । डब्लुएनओया प्रमुख संरक्षकतकं जुयाच्वनादीम्ह शताब्दी पुरुष जोशीया झिंस्वन्हुया पुण्य तिथि लाकाः जूम अनलाइन मार्फत उगु ज्याझ्वः याःगु खः ।

संस्थाया संरक्षक दयारत्न शाक्यं मदुम्ह शताब्दी पुरुष जोशीया बःचाहाकःगु लुमन्ति न्ह्यब्वयादिसें न्ह्याःगु ज्याझ्वलय् संस्थापक नायः डा. बालगोपाल श्रेष्ठं सत्यमोहन जोशीं च्वयादीगु सिद्धिदास नाटकयात कयाः नुगःखँ तयादीगु खः । वय्कलं राजनीतिक व्यक्तित्व मजूसां राजनीतिक आन्दोलनय् नं वय्कःया भूमिका दुगु खँ न्ह्यथनादिसें आः जोशीया नामं शैक्षिक ज्याझ्वः यायेगु नापं छात्रवृत्ति नं व्यवस्था यायेमाःगु खँय् बः बियादिल ।

डब्लुएनओया निवर्तमान नायः सिजन श्रेष्ठं जोशीयात नाप लानागु ईया घटना न्ह्याब्वयादीगु खःसा सल्लाहकार प्रा. पे्रमशान्ति तुलाधरं नेपालभाषा व नेवाः लोक म्येँय् जोशीया आपालं योगदान दुगु खँ न्ह्यथनादिसें वय्कःया साहित्यिक लेखनया कारणं हे नेपाःया आपालं छेँखा छेँखाय् म्हसीकेत ताःलाःगु विचाः तयादिल ।

डब्लुएनओया नायः संयुक्त श्रेष्ठं कला ख्यलय् सत्यमोहन जोशीं बियादीगु योगदानयात कयाः नुगःखँ तयादीगु खः । वय्कलं सत्यमोहन स्वयम थः हे नं छम्ह बांलाःम्ह कलाकार व एनिमेटर जूगु नं धयादीगु खः ।

ज्याझ्वलय् साहित्यकार केशरमान ताम्राकार, डब्लुएनओया दांभरिंलिेसें अमेरिका च्याप्टरया न्वकु दीपक डंगोलं नं नुगःखँ तयादीगु खःसा मू छ्याञ्जे शोभित शाक्यं सुभाय् देछानादीगु खः ।