भ्यालेन्टाइनया स्वां तकं विदेशं

येँ – न्हापा जूसा हरेक भ्यालेन्टाइन डेया इलय् विदेशय् गुलाफ निकासी याइगु नेपालं थुगुसी धाःसा करिब डेढ करोडया गुलाफ आयात यात । देशय् गुलाफ उत्पादन म्हो जुया वंगुया लिच्वः खः थ्व । थुगुसीया भ्यालेन्टाइनयात माःगु ८० प्रतिशत स्वां विदेशं आयात याःगु खः ।
जनयुद्धया इलय् देशय् ब्वलंगु अस्थिरतां यानाः नेपाः गुलाफ निर्यात देशं छत्थुं आयातकर्ता जूवंगु खँ स्वां व्यवसायीतय्सं धायेगु याः ।

झिदँ तक जूगु अस्थिरतां यानाः माक्व गुलाफ ह्वयेके मफुगु, धाःगु इलय् डेलिवरी बी मफुगु कारणं नेपाःया गुलाफ उत्पादन धरासायी जूगु खँ उमिसं कंगु दु । अथे खःसां भ्यालेन्टाइन डे बाहेक मेगु इलय् धाःसा नेपाःया उत्पादनं हे गुलाफया बजाः कयाच्वंगु खँ नं उमिसं धाःगु दु । नेपालय् न्हिं २५ हजार फ्वः गुलाफया माग दु ।

सामान्य इलय् नेपाःया थःगु हे उत्पादनं गाःसां विशेष अवसरय् धाःसा गुलाफ लगायतया स्वां हयेमाः । नेपालय् थौंकन्हय् दँय् २ अर्ब तकाया स्वां कारोवार जू । थुकी व्यवसायीतय्गु करिब ६ अर्ब तकाया लगानी जुयाच्वंगु खँ धाःगु दु । उकी दँय् १–२ करोडया स्वां विदेशं वइ ।