‘सामुदायिक विद्यालय नं प्रतिस्पर्धी जुइमाः’
येँ – येँ महानगरपालिकाया मेयर विद्या सुन्दर शाक्यं महानगर दुनेया स्कुलया पाठ्यक्रम स्वनिगःन्यंकंया कला–संस्कृति दुथ्याकाः विकास यानाच्वनागु खँ धयादीगु दु । येँ महानगरपालिका देय्या हे संघीय राजधानीइ लानाच्वंगु महानगरपालिका जूगुलिं स्वनिगःयात हे दुथ्याकाः पाठ्यक्रम तयार यायेगु खँ वय्कलं धयादीगु खः ।
विद्यालय व्यवस्थापक समाज नेपालया म्हिगः जूगु निक्वःगु व स्वक्वःगु साधारण सभाया उलेज्या यानादिसें मेयर शाक्यं थ्व खँ धयादीगु खः । वय्कलं थुगु आर्थिक दँया दुने यँे महानगर दुने लाःगु ९१ गुलिं सामुदायिक विद्यालय समान जुइगु छगू हे रंगं छिइगु खँ नं धयादीगु दु । अथेहे वय्कलं सामुदायिक स्कुलय् ब्वनीपिं विद्यार्थीपिं म्हितीगु थाय् सुधार यायेत, स्कुल दुने त्वनेगु लःया व्यवस्थित यायेत, चःबि दयेकेत नं थ्व आर्थिक दँय् बजेट फ्यानागु खँ नं धयादीगु दु ।
ज्याझ्वलय् न्ववानादिसें वय्कलं शिक्षकतय् दरबन्दी सम्बन्धी वयाच्वंगु समस्या ज्यंकेगु निंतिं महानगरया लगे जुयाच्वंगु, शिक्षकतय्त इलय् तलब निकासा यायेगु निंतिं मन्त्रालयं ध्यबा छ्वया महःसां मेथासंसां व्यवस्थापन यानाच्वनागु खँ नं धयादीगु खः । तलब भचा लिबाक वल अथवा विद्यालयय् छुं समस्या वल धकाः शिक्षकत निराश जुइमजिउ धासें वय्कलं धयादिल, ‘शिक्षकत हे निराश जुल धाःसा शिक्षा ख्यः हे धरासायी जुइ, उकिं आशावादी जुया ज्या यायेमाः । महानगरपालिका नं विद्यालय सुधारया ज्याय् न्ह्याये वनेत तयार दु ।’
अथेहे वय्कलं सामुदायिक विद्यालयय् नं प्रतिस्पर्धी जुइमाःगु खँ धासें धयादिल, ‘निजी स्कुलयात निषेध यायेगु मखुकि सामुदायिक स्कुल प्रतिस्पर्धी जुइमाः । थ्व ज्या सरकार, मन्त्री वा मेयरं जक यानाः जुइगु ज्या मखु । थुकिया निंतिं प्रधानाध्यापक, शिक्षकपिं नं जिम्मेवार जुइमाः ।’
ज्याझ्वलय् न्ववानादिसें समाजया अध्यक्ष राजेश्वरमान श्रेष्ठं समाजं याना वयाच्वंगु थीथी ज्याया बारे जानकारी बियादिल । थ्व झ्वलय् वय्कलं शिक्षक दरबन्दी मिले यायेगु निंतिं सुयातं मर्का मजुइ कथं व्यवस्थापन यायेत समाजं समन्वयकारी भूमिका म्हिता च्वनागु खँ धयादिल । अथेहे वय्कलं शिक्षकतय्त थीथी तालिम बीगु, विद्यालय दथुइ सुचं कालबिल यायेगु, शिक्षकपिंत थीथी स्कुलय् अध्ययन भ्रमणय् यंकाः सहलह ब्याकेगु, अनुभव कालबिल यायेगु ज्या समाजपाखें याना वयाच्वनागु खँ धयादिल । अध्यक्ष श्रेष्ठं संविधान कथं आः सामुदायिक विद्यालयत स्थानीय तहया मातहतय् वयेधुंकूगुलिं थीथी स्थानीय तहय् समाजया ईकाइत गठन याना वनेगु खँ नं धयादिल ।
ज्याझ्वलय् लसकुस यासें समाजया उपाध्यक्ष कृष्णकुमार श्रेष्ठं शिक्षकत विस्थापित जुया वनाच्वंगुलिं विद्यालयय् शिक्षकतय् हे समस्या जुयाच्वंगु धासें थुकियात व्यवस्थित यायेत महानगरपालिकां ध्यान बीमाःगु खँ धयादिल । अथेहे जनकल्याण माविया प्रधानाध्यापक कुमारी कमला राईं थःपिनिगु स्कुलय् झिंछसःम्ह विद्यार्थी दु, तर शिक्षक दरबन्दी मुक्कं नीनिम्ह जक दु धयादिसें यक्व विद्यार्थी दुगु स्कुलय् तसकं म्हो जक शिक्षक दरबन्दी दुगुलिं अध्यापनय् गुणस्तरता हयेत थाकुयाच्वंगु खँ धयादिल ।
ज्याझ्वलय् येँ महानगरपालिका शिक्षा विभागया अधिकृत तारापति खरेल, शिक्षा विकास तथा समन्वय समितिया नन्दलाल पौडेल, येँ मनपा २० वडा अध्यक्ष राजेन्द्र मानन्धरं नं न्ववानादीगु खः ।
साधारण सभां समाजया न्हूगु ज्यासना पुचः नं ल्यःगु दु । न्हूगु ज्यासना पुचलय् अध्यक्ष राजेश्वरमान श्रेष्ठ –प्रभात मावि), उपाध्यक्ष सुदर्शन कट्टेल –भक्त विद्याश्रम), सचिव रविना महर्जन (सरस्वति निकेतन मावि), सहसचिव रिता तिवारी –पद्मकन्या मावि), कोषाध्यक्ष प्रमोद कृष्ण श्रेष्ठ (नव आदर्श मावि), दुजःपिं अमृता श्रेष्ठ (इचंगु आधारभूत विद्यालय), गीता काफ्ले (नन्दी मावि), मेघबहादुर बन्जारा (गुह्येश्वरी मावि), नातीकाजी महर्जन (ज्ञानोदय मावि), सरिता क्षेत्री (नेपाल युवक मावि) व लक्ष्मण पौडेल (जुद्धोदय मावि)यात ल्यःगु खः ।
LEAVE YOUR COMMENTS