ने. सं. ११४४ कौलाथ्व चौथी -

मुनासःया लुँबुदिं हनाज्याझ्वः

किपू(नेपालभाषा टाइम्स)- ख्यालः विधायात च्वन्ह्याकेगु तातुनाः नीस्वनातःगु पुलांगु संस्था ‘मुनासः’ न्यय्दँ क्यंगु लसताय् छगू तःजिक ज्याझ्वः यासें हन । मुनासःया संस्थापक नायः श्रीराम श्रेष्ठया सभातित्वय् जूगु ज्याझ्वःया उलेज्या यल महानगरपालिकाया प्रमुख चिरिबाबु महर्जन, यल महानगरपालिकाया उपप्रमुख सुनिता डंगोल व किपू नगरपालिकाया कार्यवाहक मेयर शुभलक्ष्मी शाक्य (सुनितां) मंकाः कथं स्वप्वाः त्वाःदेवाय् मत च्याकाः यानादीगु खः ।

मुनासःया छ्याञ्जेलिसें ख्यालिजुजु मदनकृष्ण श्रेष्ठं लसकुस यानादीगु ज्याझ्वः संस्थाया संंस्थापक दुजःलिसें मुनासःपाखें ग्वसाः ग्वःगु ज्याझ्वः व ख्यालकय् योगदान बियादीपिं मदुपिनिगु लुमंतिइ छगू मिनेट मौनधारण यासें न्ह्याःगु खः । मुनासःया म्हसीका भिडियो क्यँसे न्ह्याःगु ज्याझ्वलय् संस्थाया लुँबुदिंया लसताय् च्वयातःगु म्येँ ‘छिगु सः, जिगु सः, झी सकसिगुं सः मुनासः’ नं सार्वजनिक याःगु खः । नांजाःम्ह निर्देशक सुरेन्द्र तुलाधरं च्वयादीगु व संगीतज्ञ अमरराज शर्मां लसय् हनादीगु म्येँ सतिश महर्जन व निशा देसारं सः बियादीगु खः । थुगु म्येँया संगीत संयोजन जीवित जल्मीं यानादीगु खः ।

ज्याझ्वलय् विशेष पाहांकथं झायादीपिं जनकवि दुर्गालाल श्रेष्ठ, जनगायक भृगुराम श्रेष्ठ व नांजाःम्ह साहित्यकार पुष्पबहादुर चित्रकारयात हनेज्या नं याःगु खः । वय्कःपिंत मुनासःया संस्थापक नायः श्रीराम श्रेष्ठं दोसल्ला न्ययेकादीगु खःसा संस्थापक न्वकु कवि नविन चित्रकारं लुमंति चिंकथं संस्थाया प्रतीक गं लःल्हानादीगु खः। अथे हे छ्याञ्जे मदनकृष्ण श्रेष्ठं स्वांमाः क्वखायेकादीगु खः ।

थुकथं हे ज्याझ्वलय् थनिं न्यय्दँ न्ह्यः मुनासलं ग्वसाः ग्वःगु ख्यालः धेंधेंबल्लाः कासाय् ब्वति काःगु थीथी खलः पुचः, संघसंस्थालिसें ख्यालः च्वमि, स्यनामि, कलाकारलिसें थीथीकथं ग्वाहालि यानादीपिंत मुनासःया संस्थापक दांभरिं मोहनलाल श्रेष्ठं लुमन्ति चिं लःल्हानादीगु खः ।

न्यय्दँ क्यंगु लुँबुदिं हनाज्याझ्वलय् मुक्ति संगीत प्रशिक्षण केन्द्रपाखें रसिक जधारी व रसिका जधारीं महाकाली प्याखं (दैत्य बध) क्यंगु खःसा जुजुभाई तुलाधर, सुनिल चित्रकार, जुजुकाजी रंजित, रवि हाडा जीवित जल्मीं थीथी लोकंह्वाःगु म्येँ न्यंकादीगु खः । अथे हे मुनासःया ग्वसालय् जूगु ख्यालः कासाय् न्हाप लाःगु मदुम्ह श्रीकृष्ण ‘अणुं’ च्वयादीगु ख्यालः ‘खः ला मखुला ?’ राजेन्द्रमान शाक्य व रेवन्तलाल श्रेष्ठं न्ह्यब्वयादीगु खः ।

मुनासःया लुँबुदिंया लसताय् च्वयातःगु म्येँया म्येँहालामि, च्वमि, संगीतकारयात यल महानगर प्रमुख महर्जनं मतिनाया चिं लःल्हानादीगु खःसा लुँबुदिं हना ज्याझ्वलय् म्येँ हालामि कलाकारपिं व लुँबुदिं हनाज्याझ्वः ताःलाकेत ग्वाहालि यानादीपिं संस्थापक नायः श्रेष्ठं मतिनाया चिं लःल्हानादीगु खःसा आर्थिक, ज्याझ्वःया प्रायोजन व थीथीकथं ग्वाहालि यानादीपिंत मदनकृष्ण श्रेष्ठं मतिनाया चिं लःल्हानादीगु खः ।

ज्याझ्वलय् पाहांकथं झायादीपिं प्रकाश साय्मि व हरिवंश आचार्यं भिंतुना देछायादीगु खः । भिंतुना देछायेगु झ्वलय् हरिवंश आचार्यं मुक्कं नेवाः भासं संबोधन यानादीगु खः ।

मुनासः नीस्वनेधुंकाः खुदँ तक मदिक्क ख्यालः कासा यायेत ताःलाःगु खःसा अनं लिपा ४४ दँ तक दिनाच्वंगु संस्थायात न्ह्यःने यंकेकथं न्हू पुस्तायात संस्थाया नेतृत्वया जिम्मेवारी नं लःल्हाःगु खः । ज्याझ्वःया लिपांगु ब्वय् संस्थापक नायः श्रीराम श्रेष्ठं मुनासःयात हाकनं न्हापा थें सक्रिय रुपं न्ह्यःने यंकेगु निंतिं सुरेन्द्र तुलाधरयात नायःया जिम्मेवारी लःल्हानादीगु खः ।

मुनासःया नेतृत्व न्हू पुस्तायात लःल्हायेगु झ्वलय् नायः श्रेष्ठं मुनासःया प्रतीककथं दयाच्वंगु गं आकिवंनिसें मदिक्क न्याःगु सः तायेदइ धइगु विश्वास प्वंकादिसें निरन्तर रुपं ख्यालः कासा न्ह्याइगु आशा यानादिल । लिसें वय्कलं ४४ दँ तक दिनाच्वंगु मुनासः आः स्वनिगः दुने जक मखु स्वनिगः पिने देय्न्यंकं मुनासःया गं न्याइ धइगु विश्वास प्वंकाच्वना धयादिल ।

न्हूगु नेतृत्व लःल्हाना कासे तुलाधरं पुलांगु नेतृत्वं खुक्वःतक ग्वसाः ग्वःगु मुनासः ख्यालः कासायात निरन्तरता बीगु व थ्व झ्वलय् आकिवं सापारुया लसताय् न्हय्क्वःगु मुनासः ख्यालः कासा यायेगु घोषणा यानादिल । पुलांगु नेतृत्वं दयेकातःगु नियम दुने हे च्वनाः ख्यालः कासायात न्ह्यःने यंकेगु नं वय्कलं धयादिल ।

मुनासःया न्हूगु ज्यासना पुचलय् न्वकु लक्ष्मीकुमार महर्जन, छ्याञ्जे सुरज व्यञ्जनकार, दांभरिं मञ्जु श्रेष्ठ व दुजलय् सुनिता श्रेष्ठ, रुमन जोशी, नविन थेच्वमि, भोगेन्द्र मानन्धर, शोभा महर्जन, अष्टमाया महर्जन व रञ्जना सितिखु च्वनादीगु दु । उगु इलय् संस्थापक नायः श्रीराम श्रेष्ठं न्हू पुस्ताया नायः तुलाधरयात संस्था लःल्हाना पौ नं लःल्हानादीगु खः ।

ने.सं. १०९२ य् श्रीराम श्रेष्ठया नेतृत्वय् नीस्वंगु मुनासःया मेपिं संस्थापक पदाधिकारीइ नविन चित्रकार न्वकु, वीरेन्द्र मान जोशी छ्याञ्जे, मोहनलाल श्रेष्ठ दांभरिं व दुजःपिं प्रदीपकुमार श्रेष्ठ, केशवलाल श्रेष्ठ, साइलाकाजी तुलाधर, मंगलनारायण जोशी, श्यामभक्त श्रेष्ठ, हरि तण्डुकार व तारा प्रधान हाडा खः । मुनासलं खुदँतक ख्यालः कासा ग्वसाः ग्वःगु खः ।