ज्वना तःपिं थारू नेतात त्वःतेत माग

येँ – थरुहट थारुवान राष्ट्रिय सम्मेलन तयारी समितिं शान्तिपूर्ण थरुहट आन्दोलनया झ्वलय् टीकापुर घटना लिपा थीथी अभियोगय् मुद्दा तयाः फँसे यानातःपिं राजबन्दीतय् मुद्दा लित कायेगु, खारेज व आममाफी बीमाःगु माग याःगु दु । समितिं म्हिगः रिपोर्टर्स क्लबय् ग्वसाः ग्वःगु पत्रकार सम्मेलनय् उगु माग याःगु खः ।

समितिं टीकापुर घटना बारे सत्य तथ्य छानविन यायेत तत्कालीन सरकारं पूर्व न्यायाधीश गिरिशचन्द्र लाल दास नेतृत्वया न्यायिक समितिया प्रतिवेदन नं सार्वजनिक यायेगु लिसें सर्वदलीय संसदीय समिति व राष्ट्रिय मानवअधिकार आयोगया प्रतिवेदन तुरुन्त सार्वजनिक यायेमाःगु माग नं याःगु दु ।

ज्याझ्वलय् थारु नेता लक्ष्मण थारुं थः ४२ महिनाया जेल जीवन लिपा न्हापांखुसी मिडियाय् वयागु खँ कनादिसें आः हाकनं शान्तिपूर्ण आन्दोलन थः न्ह्याः वनेगु खँ कनादिल । वय्कलं राज्य थारुतय्त ख्यायेगु ज्या यानाच्वंगु दु धासें थःपिनि छेँ, पसलय् मि तःगु खःसा नं थःपिंसं हे झुठा मुद्दा फयेमाःगु खँ कनादिल ।

थःपिंसं आः नं न्हय्गू प्रदेशयात माने यायेमफइगु खँ कनादिसें धयादी, ‘अखण्ड सुदूरपश्चिम माग याइपिंत वहे दत, मधेश प्रदेश फ्वंपिंत नं दत, किराँतीतय्त नं बीत्यंगु दु, तर जिपिं थारुतय्त जक छाय् मदइ ?’

थ्वहे वइगु भदौ ७ गते देय्न्यंकंया थारुतय्त क्वकयाः सम्मेलन यायेगु खँ नं वय्कलं कनादिल । पत्रकार सम्मेलनय् राष्ट्रिय सम्मेलन तयारी समितिया संयोजक मिनराज चौधरीं नेपालय् दुगु फुक्कं क्षेत्रया वर्ग, समुदायया माग पूवंकेमाःगु माग यानादिल ।

सम्बन्धित बुखँ

LEAVE YOUR COMMENTS