‘कोरोना म्हो जुल धकाः निषेधाज्ञा चीकूगु मखु’

येँ- कोभिड १९ या जोखिम हाकनं तच्वइगु संकेत खनेदुगु खँ सरकारी अधिकारीतय्सं हे धाःगु दु । स्वास्थ्य तथा जनसंख्या मन्त्तालयया सह प्रवक्ता डा. समीरकुमार अधिकारीं छुं न्हि निसें खनेदयाच्वंगु संक्रमिततय् तथ्यांक स्वयेबलय् अझ नं जोखिम अप्वइगु खनेदुगु खँ धयादीगु दु । वय्कलं आः नं सजख मजुल धाःसा जोखिम झन ग्यानापुइगु खँ नं धयादीगु दु ।

थौंकन्हय् नं न्हि निद्वलं मल्याक संक्रमितत अप्वयाच्वंगु दु । संक्रमितत ल्याः यक्व म्हो मजूसां निषेधाज्ञा चिकेमाःगु कारण जनजीवन सहजीकरणया निंतिं जक खः धयादिसें वय्कलं ‘कोरोना हे मंत धकाः निषेधाज्ञा चीकूगु मखु’ धयादीगु दु । वय्कलं आः नं सतर्क मजुल धाःसा ग्यानापुगु अवस्थाय् वयेफुगु ख्याच्वः बियादीगु दु ।
स्वास्थ्य मन्त्रालयं वंगु महिनाय् हे कोभिड संक्रमणया स्वंगू लहर नं वयेफुगु धकाः सुचं हे बीधुंकूगु अवस्थाय् मन्त्रालयया अधिकारीया थ्व ख्याच्वः वःगु खः ।

जनस्वास्थ्यविद् डा. रविन्द्र पाण्डें नं कोभिडया स्वंगूगु लहर वयेफुगु अवस्था अझं दनि धासें धयादीगु दु, ‘भाइरसया भेरियन्ट हे हिलाः स्वंगूगु लहर वइगु स्वयां नं आः दुगु डेल्टा प्रजाति हे अप्वयेफुगु अवस्था दनि । निषेधाज्ञा चिइकेधुंकाः संक्रमण हाकनं अप्वःगु दु । बजारय् मनूतय् भीड अप्वयेधुंकूगु दु । थुकिं स्वंगूगु लहर वइगु संकेत क्यनाच्वंगु दु ।’

वय्कलं प्यन्हु तकया न्हियान्हिथंया तथ्यांक लिसे बुधवाःया तथ्यांक तुलना याना स्वयेबलय् १ हजार ३७६ म्हेसिके थप संक्रमण खनेदुगु धयागु जोखिम अप्वयाच्वंगु संकेत हे जूगु खँ धयादीगु दु । बुधवाः न्हिछिया दुने २ हजार ९७९ म्हेसिके संक्रमण खनेदुगु खः । थ्वयां न्ह्यः २२ गते २४३४ म्हेसिके, २१ ग ते २ हजार ६२२ म्हेसिके, २० गते १ हजार ६०३ म्हेसिके संक्रमण खनेदुगु खः ।

निषेधाज्ञा चिइकेवं मनूतय्के कोरोना हे मदयेधुंकूगु थेंज्याःगु सन्देश अप्वःगुलिं नं समस्या जुयाच्वंगु खँ डा. पाण्डें धयादीगु दु । ‘२५ निसें ३०प्रतिशतया ल्याखय् संक्रमण अप्वयाच्वंगु इलय् निषेधाज्ञा ह्वालुकूगु धयागु जोखिम मंत धकाः मखसे आर्थिक व मानवीय गतिविधि न्ह्याकेत जकखः धयागु थुइकेमाः । थुकियात गम्भीरपूर्वक मकाल धाःसा समस्या जुइ’ वय्कलं धयादीगु दु ।

सम्बन्धित बुखँ

LEAVE YOUR COMMENTS