ने. सं. ११४६ तछलाथ्व षष्ठी - सिथि नखः कुमार षष्ठी

त्वाःछेँया संघर्ष समिति स्वन

येँ(नेपालभाषा टाइम्स)- येँ मनपाया साबिक २८ वडाया थाय्मरु त्वालय् च्वंगु त्वाःछेँ हानं स्यंकः वःगुलिं चिन्तित जूपिं साबिक २८ वडा (आःया २५ वडा) या निवासीतय्सं थ्व ज्या पनेगु लागिं छगू संघर्ष समिति गठन याःगु दु ।

शुक्रवाः साबिक २८ वडाया खुगू त्वालय् च्वंपिं प्रतिनिधितय्गु भेलां त्वाःछेँ समितिया नायः डा. रमेश श्रेष्ठया अध्यक्षताय् उगु संघर्ष समिति गठन याःगु खः । समितिइ खुगुलिं त्वाःया प्रतिनिधित्व जुइ कथं १११ म्ह दुजः च्वनादीगु दु ।

वंगु मोहनि ताकाय् येँ महानगरपालिकां डोजर हयाः त्वाःछेँ थुनेगु ज्या यायेवं स्थानीयवासीं उकिया विरुद्ध उच्च अदालतय् मुद्दा तःगु खःसा अदालतं त्वाःछेँ थुने मतेनि धकाः अन्तरिम आदेश बियाहःगु खः । तर अन्तरिम आदेश वयेधुंकूसां नं हानं छेँ थुं वःगुलिं स्थानीयवासीतय्सं मनपाया थ्व गैरकानुनी ज्यायात पनेगु लागिं संघर्ष समिति गठन याःगु खः ।