
येँ – ठेकेदार कम्पनी पप्पु कन्स्ट्रक्सनं थनया तीनकुनेलागाय् च्वंगु बागमति खुसिइ दयेकाच्वंगु ताँया निरीक्षण संसदया विकास तथा प्रविधि समितिं याःगु दु । ताँय् प्राविधिक गडबडी जूगु धासें सतक विभागं उगु ताँ दयेकेगु ज्या रोक्का यानातःगु खः । डिजाइन व सम्झौता कथं मापदण्ड मिचे यानाः ताँ दयेकूगु धासें वंगु न्याला न्ह्यः उगु ज्या दिका बिउगु खः ।
समितिं थुगु ताँ तत्काल दयेकेगु ज्या मन्ह्याकेत काठमाडौं सतक विस्तार आयोजनायात निर्देशन बिउगु दु । आः सतक विभागं थुगु ताँया निर्माणया झ्वलय् ठेकेदारं हेलचेक्राइ याः मयाः धकाः जाँच यायेगु निंतिं पुल्चोक इन्जिनियरिङ क्याम्पसयात जिम्मा बिउगु दु ।
क्याम्पसया अध्ययन लिपा जक ताँ दयेके बीगु वा मबीगु निर्णय जुइ । कम्पनीं धाःसा मापदण्ड कथं हे ताँ दयेकागु दावी याना वयाच्वंगु दु । पप्पुं टेकु बिष्णुमतिइ दयेकूगु ताँ दयेके क्वमचाःनिवं थुनेमाःगु ठहर याःगु खः ।
LEAVE YOUR COMMENTS