सरकार, डबल नेकपा व नेकपा

थौंकन्हय् सरकारया नेतृत्व यानाच्वंगु पार्टीयात नं नेकपा धायेगु अले बम मुइकेगु घटना यानाच्वंगु दलयात नं नेकपा धायेगु यानाच्वंगु दु । उकिं मनूतय्त कन्फ्यूज जुयाच्वंगु दु । सत्ताय् नं नेकपा अले बम मुइकाच्वंगु नं नेकपा ! उकिं सत्तापक्षयात नेकपा धायेगु अले बम मुइकाच्वंगु दलयात विप्लव नेतृत्वया पार्टी, विप्लव नेतृत्वया नेकपा, विप्लव नेतृत्वया नेकपा नं धायेगु यानाच्वंगु दु । उगु पार्टीयात सरकारं ला प्रतिबन्ध तया तःगु अवस्था दु । खुल्ला रुपं छुं नं कथंया गतिविधि उगु पार्टीं याये फइगु अवस्था मदु ।

विप्लव नेतृत्वया पार्टीया नां नेपाल कम्युनिष्ट पार्टी खः । थुगु पार्टीयात चीहाकलं धायेगु खःसा नेकपा खः । अले सरकारया नेतृत्व यानाच्वंगु पार्टीया नां नेपाल कम्युनिष्ट पार्टी (नेकपा) खः । उकिं थुगु पार्टीया वास्तवय् धायेमाःगु धइगु डबल नेकपा खः । निगू नेकपा दुगुलिं अःपुक धायेगु खःसा डबल नेकपा हे खः । निगू कम्युनिष्ट पार्टी एकता जुयाः गठन जूगुलिं मखुकि पार्टीया नां हे नेपाल कम्युनिष्ट पार्टी (नेकपा) जूगुलिं खः । नामय् हे निगू थासय् नेकपा दुगुलिं डबल नेकपा धायेगु हे पाय्छि जुइ । उकिं राजनीतिक रुपं विश्लेषण याइपिंसं बुलुहुँ बुलुहुँ सरकारया नेतृत्व यानाच्वंगु पार्टीयात डबल नेकपा धायेगु याना हयाच्वंगु दु ।

थ्व निगू पार्टीया थःथःगु अडान व गतविधिया कारणं जनतां दुःख सी मालीगु जुल धकाः तकं धायेगु याना हयाच्वंगु दु । वार्ताया माध्यमं समाधान यायेगु पलेसा विप्लव नेतृत्वया नेकपायात पेले यानाः वनेगु कुतः डबल नेकपाया सरकारं याःगुलिं हे आः वयाः समस्या झन झन तच्वया वःगु खः धकाः तकं सकसिनं धायेगु यानाहःगु दु ।

लिपांगु इलय् स्वनिगलय् बन्दया नामय् जूगु बम विस्फोटनया घटनां न्ह्याम्ह हे मनू बाय् न्ह्यागु हे पार्टीया कार्यकर्ता सीगु जूसां नं आखिर मनूया ज्यान वंगु दु । थौंया इलय् नं मनूत ज्यान पायेत तकं तयार जुयाः विप्लव नेतृत्वया नेकपा दुने कार्यकर्तात दुगु जुयाच्वन, येँय् हे च्वनाः बम दयेकाच्वंगु जुयाच्वन, बम दयेकाच्वंगु खँ नेपाल सरकारया गुप्तचरतय्सं नं सीके मफुगु जुयाच्वन, नेकपाया कार्यकर्तात ला बम मुइकेगु नितिं तयारी कथं हे वनाच्वंगु जुयाच्वन धकाः पुष्टि जूगु दु । थुगु घटनां यानाः लिपांगु इलय् वयाः छगू कथं स्वनिगलय् तसकं मनूत ग्याना जुइमाःगु अवस्था वःगु दु ।

थ्वहे झ्वलय् वर्तमान केपी ओली नेतृत्वय् दुगु दुई तिहाइ बहुमतया सरकारया गृहमन्त्री रामबहादुर थापा ‘बादलं’ नेत्र विक्रम चन्द ‘विप्लव’ नेतृत्वया नेकपां जनसेनाया रुपय् प्यंगू कम्पनी दयेके धुंकूगु, जन सरकारया रुपय् जनपरिषद् तकं दयेके धुंकूगु नापं उगु पार्टीया मुख्य निशाना आःया अवस्थाय् स्वनिगः हे खः धयादीगुलिं स्वनिगःवासीत झन ग्याका च्वनेमाःगु अवस्था वःगु दु ।

सोमवाः प्रतिनिधिसभाया बैठकय् सम्बोधन यायेगु झ्वलय् गृहमन्त्री थापां गुकथं न्ववानादिल थ्व विषय तसकं गम्भीर खँ खः । गृहमन्त्रीं हे विप्लव नेतृत्वया नेकपां जन सरकार गठन याये धुंकूगु नापं स्वनिगःयात हे मूल रुपं केन्द्रित यानाच्वन धयादीगु खँ स्वयेबलय् आइतवाः बहनी व सोमवाः सुथय् स्वनिगलय् गुलि नं बम विस्फोटनया घटना जुल, मानवीय क्षति जुल, व सिबें नं ग्यानापुगु विषय खः धायेफइगु अवस्था दु ।

आइतवाः जक हे स्वनिगलय् झिगू थासय् बम बिस्फोट यायेगु योजना विप्लव माओवादीया दुगु खँ पिहां वःगु, स्वंगू थासय् विस्फोट व शृंखलाबद्ध रूपय् प्रेसरकुकर बम लुइवं प्रहरीं कोटेश्वरया नरेफाँटय् ज्वपिं न्हय्म्ह विप्लव कार्यकर्तातय्गुपाखें उगु योजना प्रहरीं सीकूगु नापं सुकेधारा व घट्टेकुलोय् बम विस्फोट जुयाः प्यम्ह मनूत सिइगु घटनां यानाः स्वनिगःवासीत आः छु जुइगु खः धकाः चिन्ता कयाच्वंगु अवस्थाय् हाकनं गृहमन्त्री थापां संसदय् न्ववानादीगु थ्व खँ न्यना स्थानीय मनूत झन हे ग्याइगु स्वाभाविक हे खः ।

अथे हे सत्तारुढ नेपाल कम्युनिष्ट पार्टी (नेकपा) या नायः पुष्पकमल दाहाल प्रचण्डं विप्लव समूह वार्ताय् वयेगुया विकल्प मदु धासें येँय् जूगु बम विस्फोट, बन्द लिसेंया गतिविधि वार्ताय् वये न्ह्यःया लिपांगु गतिविधि जूगु दावी यासें थ्व बन्द इत्यादि गुगु ज्या याःगु दु, सायद प्रकारान्तरं वार्ताया लकस दयेकेगु नितिं हे खः कि धकाः थःगु ‘व्यक्तिगत’ अनुमानया बिचाः न्ह्यःने तयादीगु दु ।
छखे गृहमन्त्रीं विप्लव नेतृत्वया नेकपां जन सरकार दयेकल धायेगु अले स्वनिगःयात लक्षित यानाच्वन नं धायेगु मेखे वहे सरकारया नेतृत्व यानाच्वंगु पार्टी डबल नेकपाया अध्यक्ष पुष्पकमल दाहालं धाःसा थुकियात वार्ताय् वये न्ह्यःया गतिविधि खः धकाः गुगु कथं धयादिल थ्व खँयात छगू हे थासय् तयाः स्वल धाःसा अवश्य नं पानाच्वंगु खनेदु । थ्व निता खँया थःथःगु कथंया अर्थ दु अले विप्लव नेतृत्वया नेकपायात थःथःगु कथं विश्लेषण यानाच्वंगु दु धकाः थुइकेमाःगु अवस्था वइ ।

न्ह्यागु हे जूसां आखिर बम दयेकेगु, कार्यकर्तातय्त ज्यान पायेत नं तयार यायेगु, सत्तापक्षयात गुकथं धक्का बीगु धइगु बारे थःपिंसं हे स्यना तःपिं नेता कार्यकर्तात न्हूगु कथं राजनीतिक मुद्दा ज्वनाः न्ह्याः वःगु दु अले उमिगु मागयात सम्बोधन यायेगु नितिं वार्ताया माध्यमं मवन धाःसा कन्हय् वनाः अझ तःधंगु समस्या वयेफु धकाः थुइकेमाः । उकिं थ्व इलय् दुई तिहाइ बहुमत दुगु सरकार नापं डबल नेकपां इलय् हे नेकपालिसे वार्ताया माध्यमं समस्या समाधान यायेगु कुतः यायेमाः मखुसा थुकिं कन्हय् वनाः झन झन तःधंगु रुप कायेफु धकाः स्वयं गृहमन्त्री नापं दाहालया धापूपाखें नं पुष्टि जुइ । थुगु खँय् इलय् हे गम्भीर जुया न्ह्याः वनेमाःगु आवश्यकता दु ।