होटल, रेष्टुरेन्टय् क्वःछिनातःगु थासय् जक धुम्रपान यायेत निर्देशन
येँ (नेपालभाषा टाइम्स) – येँया होटल, रेष्टुरेन्टय् न्ह्यःने लाःथाय् च्वनाः धुम्रपानलिसें सुर्तीजन्य पदार्थ सेवन याये मदइगु जूगु दु । जिल्ला प्रशासन ज्याकू येँय् नं जिल्ला दुने संचालन जुयाच्वंगु होटल व रेष्टुरेन्टय् अव्यवस्थित रुपय् क्वःछिनातःगु थाय् बाहेकं लाःलाःथाय् हुक्का, चुरोट व सूर्तीजन्य पदार्थ प्रयोग जुयाच्वंगु धासें ध्यानाकर्षण याकूगु दु ।
जिल्ला प्रशासन ज्याकुथिं छगू सुचं हे पिथँसे दक्व होटल, रेष्टुराँ व्यवसायीतय्त कानुनकथं धुम्रपान क्षेत्रया व्यवस्थापन यायेत कडा निर्देशन बिउगु दु । जिप्रका ज्याकुथिं होटल व रेष्टुराँय् न्ह्यःने लाःथाय् चुरोट, हुक्का सेवनया कारणं धुम्रपान मयाइपिनिगु स्वास्थ्यय् लिच्वः लाःगु धासें कानुनी व्यवस्थाया पूर्णरुपं पालना यायेत नं सम्बन्धित व्यवसायीतय्त निर्देशन बिउगु दु ।
ज्याकुथिं अव्यवस्थित धुम्रपानं सेवन मयाइपिंत बांमलाःगु लिच्वः लानाच्वंगु धइगु गुनासो सर्वसाधारणपाखें वयेवं अज्याःगु थाय् व्यवस्थापन यायेत निर्देशन बिउगु खः ।
सुर्तीजन्य पदार्थ (नियन्त्रण व नियमन याइगु) ऐन, २०६८ कथं धुम्रपान याये जिउगु थाय् व मजिउगु थाय् स्पष्ट रुपं छुटे यायेत व धुम्रपान याइगु थासय् प्यखेरं बन्द यानाः मेपिंत लिच्वः मलाइगु कथं व्यवस्था यायेत नं इनाप याःगु दु ।
ज्याकूयाकथं धुम्रपान यायेगु थाय्यात प्यखेरं बन्द यानाः उगु थासं पिहां वइगु कुँया लिच्वः मेपिं सेवाग्राहीयात मलाइकथं व्यवस्था यायेत धाःगु दु ।
अथे हे जिप्रका ज्याकुथिं होटल रेष्टुरेन्ट संचालन यायेबलय् कानुनं क्वःछिनातःगु मापदण्ड सकतां पूवंकेत नं व्यवसायीतय्त इनाप यासें स्वयं जिल्ला प्रशासन ज्याकू व मेमेगु क्वःछिनातःगु अनुगमन निकायपाखें गुगुं नं इलय् अज्याःगु व्यवसायया अनुगमन याये फइगु खँ नं न्ह्यथंगु दु ।
अनुगमनया इलय् क्वःछिनातःगु ऐन व मापदण्ड अःखः ज्या जूगु लुत धाःसा सुर्तीजन्य पदार्थ (नियन्त्रण व नियमन यायेगु) ऐन २०६८ या दफा १७ कथं अधिकतम कारवाही जुइगु ख्याच्वः नं बिउगु दु ।
LEAVE YOUR COMMENTS